Wat ktah ia ka par umphniang bad ia u pud u sam, maham ka NNPG ia U MR ka Nagaland

Kohima:Ka Working committee jong ka Naga National Political Group (NNPGs) ka la pynpaw ka jingpyr shah jur ia ka jingthmu ban ia soi soskular hapdeng ka sorkar jylla jong ka Assam bad Nagaland na bynta ban sam umphniang bad ban pynbeit noh ia u pud u sam.

Ka NNPGs, ka dawa na u myntri rangbah jong ka jylla Nagaland, ba un weng noh ia ka jingiasoi soskular bad ka jylla Assam haba iadei bad ka jing pynbeit ia u pud u sam bad ka jing pyrshang ban wad umphniang, namar kan ktah ia ka histori jong ki Naga bad kam shong hok bad um lah satia ban pdiang, da kito kiba ia don bynta lang.

Ka la iathuh shuh ruh ba ka sorkar jylla jong ka Assam bad Nagaland kam don satia ia ka bor ban iakren ne ia pynbeit da ka jing sngewthuh jingmut haba iadei bad ka umphniang bad ka jing iasoi haba iadei bad ka jing pynbeit ia u pud u sam, namar kitei ki mat ki dei ba hap ban iakren hapdeng ka WC, NNPGs bad Sorkar India(GOI).

Kane ka mat ka dei ka bynta ba khatduh jong ka jingiakren hapdeng ka Indo Naga, kaba dang ap ia ka jing mynjur ba khatduh na ka sorkar India bad na ka kynhun seng jong ki Naga, la iathuh ka NNGPs.
Ki nongialam kim dei satia ban shim ia ka lynti jong ka jingiasuk kum ka laisen, ban leh katba ki mon haba iadei bad ka khyndew ka shyiap bad ki marpoh khyndew. Ki dei pat ban shim ka jingkitkhlieh, lada don kano kano ka jingjia ha ki bynta ba ia kajia.

Kumban shu pynkynmaw ba ha ka taiew ba la dep ki artylli ki sorkar jylla, ki la ia mynjur lang ban sdang noh ia ka jing wad umphniang ha shi lynter jong kito ki jaka, ba ia kajia hapdeng ki artylli ki jylla.
U Myntri Rangbah jong ka jylla Nagaland, u la iathuh ba la ia mynjur lang ban iasoi ia ka jingiateh ban wad umphniang ha kito jaka ba ia ka jia hapdeng ki artylli ki jylla.

Kane ka jingkren na u myntri rangbah jong ka jylla Nagaland ka la wan hadien ba u la ia kynduh ia u myntri rangbah jong ka jylla Assam, u Himanta Biswa Sharma, ha ka sngi palei ka 21 tarik Iaiong ha nongbah Delhi.
Ka sorkar Assam bad Nagaland ki la shim ruh ia ka rai ban pynbeit noh ia u pud u sam hapdeng ki artylli ki jylla, da ka jing ia mynjur lang bad suk lang na baroh arliang.