“Wat khot kpa iano iano!”

AIS Suja

Kane ka dei ka jingpynrem jong u Jisu ia ki Nongthoh bad ki Pharisi (teacher of the law and Pharisees) kiba dei ki Jiw ha kato ka por. U Jisu u khang da kaba ong – “Phi wat leh, kat kum ka rukom ba ki leh. Namar kine ki nongthoh bad ki Pharisi ki dei ki briew kiba teh ki jingkit ba khia ha tyrpeng ki briew, hynrei ialade kim treh ban pynkhih wat ia la ki shynriahti, hynrei ki pynbor ia kiwei pat. Kat kaba ki leh, ki leh tang ban iohi briew khnang ban ioh nam ioh burom ialade ban sngewkmen ha lade haba ki briew kin khot ia ki Rabbi ne Nonghikai Niam, ba ki da sngew khraw sngew kyrpang ialade ba ki long ki Nonghikai Niam.

Ki leh kumno? ki phong ki jain kiba jynsur kiba remdor kiba kyrpang, bad ki ieit ia ki jaka jingkhawai namar ba bun ki paidbah ba ki paidbah kin burom ia ki namar ka kyrdan Rabbi ne Nonghikai Niam jong ki. Mathaios 23:1-7.

U Jisu u iohi ia ka jinglong arsap jong ki ia ka jingkwah burom jong ki. Kumta u Jisu u la khang ia ki paidbah da kaba ong – “Wat shah ban khot Rabbi ne Nonghikai Niam ia phi, namar ym don da uwei pat u Nonghikai jong phi, hynrei tang U KHRIST (Christ alone) namar baroh phi ialong shipara (brotherhood). U Jisu u ong kumne dei namar ba u iohi biang biang ba kaba shim kyrdan ialade kum u Rabbi ne Nonghikai, ki ia pynkhraw ialade ki shim ka burom sha lade, sngew kumba ki long ki trai ne ki kynrad bad ia kiwei pat kum ki shakri. Kumta u Jisu u pynduhnoh ia kane ka rukom kaba dei jong ki Nongthoh bad ki Pharisi, teacher of the Law and Pharisees.
U Jisu u ong ruh – “Wat khot u Kpa jong phi (Father) iano iano uba ha ka khyndew namar don tang uwei u kpa jong phi uba ha bneng. U Jisu um shah ban khot kpa ne Father ne Reverend ia uno uno u briew namar ym don Father ne Reverend lait na u Jisu marwei. Ngi baroh ngi ia long tang kum shipara (brothers). U Jisu um shah ban khot ialade u Nongialam ne ki Nongialam (leaders) ha ka Niam ka Balang. Namar don tang uwei u Nongialam jong phi uba dei u Jisu Khrist kein.
U Jisu u ong – “Uta uba kham khraw napdeng jong phi to un long kein tang kum u shakri jong phi (servant; not Father not Reverend) ka mut um dei u trai ne u kynrad. “Namar ia uba pynkhraw ialade, yn pynpoh ia u, bad ia uba pynpoh ialade yn pynkhraw ia u kein” Mathaios 23:8-12.
“Namar kata, kordit ia phi ki Nongthoh bad ki Pharisi (teacher of the Law and Pharisees). Phi khang ia ka Hima ki bneng ha khmat ki briew. Namar ialade phim leit hapoh, ia kiwei pat ruh phim shah ban ki leit shapoh”.
Kordit ia phi ki Nongthoh bad ki Pharisi namar phi iaid kylleng sawdong tang ban pynkylla niam (khlem pynkylla bamut). Haba uta u la kylla niam phi pyllong ia u u khun ka dujok uba arshah ia phi”. Mathaios 23:13-15. (ka mut ialap ia ka Niam ym ia u Khrist ba la sahnarphna).
Na kata ka daw ka ktien u Blei ka khnang da kaba ong ba ym don da uwei pat u Kpa Father ne Reverend ne Nongialam (leader) uba ha ka khyndew lait noh tang u Jisu Khrist hi marwei. Namar ngi, baroh lang ngi long tang kum shipara, bad kita kiba halor jong ngi ki dei tang ki shakri, ong ka ktien u Blei. Mathaios 23:11.
Na kane ka jingkren u Jisu to ngin ioh sngewnoh bad ngin shai ki khmat ba ngin tip ba ym lah ban khot Father ne Reverend lane Leader iano iano uba ha ka khyndew, hynrei tang uwei, u Jisu Khrist kein. Namar kine kiei kiei baroh ki long tang kum ki Nongthoh bad ki Pharisi kiba long pateng la pateng kaba shim burom ialade ym ia u Blei. Katkum ka ktien jong u. Namar kata katkum ka ktien u Blei, ym lah ban khot Kpa iano iano ia uba ha khyndew namar ngi baroh ngi long shipara ha u Trai kein. Pynban ia uba halor jong ngi – u long tang kum u shakri Mathaios 23:11. Ka ktien u Blei kam kren tang ia ki Jiw jong kato ka por, hynrei ka kren ha ngi mynta, namar u Jisu u long ujuh uba hynnin mynta shaduh ki bymjukut. Amen.