Wat ka jingkyntiew kurim ka dei mynta, ka NPP-PDF ki la ïalang la slem bha, ong U Conrad

Shillong:Ki MLA ka People’s Democratic Party (PDF) kila pynïasoh noh ïalade bad ka National People’s Party (NPP) ha ka jingïalang ba ishongkun hapoh ka Ophis treikam ka NPP ha Shillong.

U National Pre sident ka NPP bad Myntri Rangbah ka Jylla Conrad K Sang ma, ula ïadonlang ha kane ka sngi sah jingkynmaw ha ryngkat bad ki para ba ïatreilang kata u Vice President ka NPP bad Symbud Myntri Rangbah Bah Prestone Tynsong, Symbud Myntri Rang bah Bah Sniawbha lang Dhar, ki Myntri Sorkar Kong Ampa reen Lyngdoh, Coming one Ymbon, Marcuise Marak bad ki Nong ïalam bad nongtrei ka NPP.

Ka PDF ka don arngut ki MLA bad kine ki dei u President Bah Gavin M Mylliem uba mihkhmat ïa ka Sohra bad u Working President Bah Banteidor Lyngdoh uba mihkhmat ïa ka Mawkynrew.
Ha kane ka sngi, la ïasoi ruh ïa ka soskular ïabynrap (merger document) hapdeng kine ki artylli ki party, kiba don ïa 11 tylli ki mat.
Haba kren ha kane ka jingïalang, u Vice President ka NPP bad Symbud Myntri Rangbah ka Jylla Bah Prestone Tynsong ula ong ba ka jingïateh soskular ba la ïasoi ka dei ïa kaban shimkhia kum ka “jingïateh shongkurim”. Ula ong “Kum ka jingïateh shong kurim, ngim dei ban ïakhlad lynti noh tang 2-3 bnai lane 1-2 snem hynrei “Tang ka jingïap ka ban pynïakhlad”.

Haba pdiang ïa kine ki arngut ki MLA sha ka Party, u National President ka NPP u Conrad K Sangma ula pynbud ïa ka jingkren u Symbud Myntri Rangbah Bah Prestone bad ong ba wat la ka jingïakyntiew kurim ka dei ha kane ka sngi, hynrei ka (NPP bad PDF) ki la ïalang samla la slem bha.
U ong ba ka jingïakren halor ka jingwan bynrap ka dei kaba la pynlong la slem bha hynrei ki arngut ki MLA ki la shimpor ban ïakren bad ban wanrah lang ïa ki Nongkyrshan, kaba dei ka rai kaba biang eh.
Ula kular ruh ba kane ka soskular ba la ïateh ka dei kaba la dep ban khmih bad pule bha, bad ba ka Sorkar Jylla kan sa leh ïa kaba donkam halor ki jingdawa.

Halor kane ka jingwan bynrap lang sha ka NPP, u MLA ka Mawkynrew bad Myntri kam ïalehkai barim ka Jylla u Bah Banteidor Lyngdoh ula ong, “Ym ju don satia u paralok ba shirta lane u nongshun ba shirta ha ka kam saiñ hima sima”.
Ula ong ba kane ka dei ka sngi ka bansah jingkynmaw namar u sngew ba ka dei ka sngi kyntiew kurim jong u.
Hynrei, ula ban jur ba kane ka jingleit bynrap lang kam dei satia ka thong shimet jong u hynrei na ka bynta ka bha ka miat ki paidbah. “Ngi la bynrap lang bad ka NPP, ym ba ngin myntoi shimet hynrei na ka bynta ka jingmyntoi ki briew jong ngi,” ong u Bah Banteidor.
U President ka PDF bad MLA ka Sohra Bah Gavin M Mylliem ula ong ba ka rai ban bynrap lang ka dei u soh jong ka jingtreikam hapoh ka jingïalam u Myntri Rangbah u Conrad K Sangma bad ka Sorkar MDA, kaba la pynsngewthuh ïa ka ‘Meghalaya kaba kham bha,” hapoh jong u.

“Namar ka dei ha ka jingïalam jong u (CM) ba ngi la ïohi ïa ka Meghalaya kaba kham bha. Ki briew ki lah ban kynnoh shibun kiei kiei hynrei hadien ba ngi la ïakren bad ki Nongkyrshan jong ngi, ngi la shim ïa ka rai kaba dei eh,” ong u Bah Gavin.

Hynrei, u General Secretary ka PDF Bah Auspicious Lyngdoh Mawphlang, ula ban jur ba ka PDF ka dei ka party kaba dang im bad kaba khlem pat pynwai satia.