Shillong: Wat hadien ba la jan dap lai snem ka jingshah shoh bad jing shah thombor jong ka Amita Sangma bad ka kong Agnes Kharshiing, hynrei kane ka mukotduma, ka dang sah kut kumjuh bad khlem iaid shaei shaei ruh; ha kaba na ka liang ka Amita Sangma ka la pynpaw ia ka jingbynniaw halor kane ka bynta.
Lah ban kdew hangne ba ha ka 8 tarik u Naiwieng 2018, ka kong Anges Kharshiing President ka Civil Society Women’s Organisation bad ka Amita Sangma, ha ryngkat u nongniah kali jong ki, u bah E Kurbah ki la shah thombor ha ki briew ki ba don kumba 40 ngut eiei, ha ka shnong Tuber Sohshrieh ha East Jaintia Hills District.
Haba ia kren bad ki lad pathai khubor na ka liang ka Sangma ka la ong “Ha u bnai ban wan ha ka 8 tarik kan sa dap 3 snem ka jingshah thombor jong ngi, hynrei haduh mynta ia kane ka case khlem don eiei bad na ka liang jong ngi ngi sngewthuh ruh ba ngin ym ioh ia la ka jong ka hok, namar ba ka jingshah thom bor jong ngi ka dei kaba la don kti da ki briew jong u Myntri rangbah ka Jylla u Conrad K Sangma”.
“Ki briew jong u Myntri rangbah ka jylla u Conrad Sangma kiba la bom la tied ia nga bad ia ka Kong Agnes, u bah Nidamon Chullet u ba la don lang ha kato ka sngi u la shoh bad tied ia ngi bad halor kane baroh u Conrad K Sangma u tip bha ba katno ngut ki briew jong u, ki ba la donkti ban shoh ban bom ia ngi”ka la bynrap.
Ka Sangma ka la iathuh ruh ba ha ka por ba ka dang shah sumar hapoh hospital na ka jingmynsaw, hadien ba ka la shah thombor ha kine ki briew u Myntri rangbah ka jylla, u la wan ban peit ia ka ha hospital, ha kaba na ka liang ka Amita ka la kwah ban ia thuh ia kaei ka ba jia ia ki ha u Myntri rangbah. “Namar ba u dei u myntri rangbah ka jylla nga la kwah ban ia thuh ia u Conrad K Sangma ia kaei ka ba la jia namar ba nga la tharai ba lada ka iathuh ia u, kan ioh jingiarap hynrei kaba pynlyngngoh ia nga ka long ba na ka liang u Myntri rangbah u la ong ia nga ba wat ju iathuh eiei halor kane ka jingjia bad kan bha ba kan sngap jar” ka la ong. Ka la bynrap ruh “Ynda ka la ioh sngew ia kane ka jingkren, na ka liang u Myntri rangbah ka la pynlong ia ka, ba kam nud shuh ban ia thuh bad ka la buh ruh ha ka jing pyrkhat ba balei u myntri rangbah u la phah ban sngap jar ia nga”.
Ka la ong ruh ba ka jingwan ai jingiarap jong u bah Nidamon Chullet ia ka pisa ka ba long T2 lak, na ka bynta ka Covid Relief Fund ha ka por Covid ka pynpaw shai ba u dei u briew u ba ia jan bad u myntri rangbah. “Nga la sngewthuh ba halor ka ne ka jingjia ngin ym ioh shuh ia la ka hok lano lano ruh namar ba ka dei ka NPP party ka ba la donkti bad u Conrad K Sangma u tip bha ba u briew jong u, u ba la shoh ia ngi”ka la ong.
Ka la kynnoh “U Myntri rangbah ruh u tip bha ba mano mano ba donkti ha kane ka kam thombor, ha kaba u iai shah ia ki nongpyniap briew ki nongshoh briew kane ka paw shai ba u ruh u donkti lang ha kane ka kam“. Ka la ong ruh ba naduh ba jia kane ka jingjia na ka liang ka sorkar jylla ka la dep ban kular ba kin thung da ka kynhun tohkit ba laitluid ban lap ia ka jingshisha halor kane ka kam, hynrei haduh mynta kane ka la shu sngap jar bad ym shem la don shuh uwei ruh u ban ong eiei halor ka ne ka bynta.
Phi don ban ong eiei?