Wat iam kongthei

[khana ba bteng]

Haba la mih nangta ka Lanosha pat ka khlem iawer lang shuh ia ka Kongthei Daplin namar ba la dum ka bneng. Ka Kongthei Daplin ka la ioh lad ban on lynti tang ha la ka jong ka khmat iing ia u Bah Malki. Lait nangta bran ka Lanosha bad u Bah Malki ki la iaid hi noh ban rung sa ha iing ka Lanosha. Haba la poi ha iing ka Lanosha la phah rung iaki sha kamra shongkai . La wan pdiang burom ruh da u kpa jong ka. Hadien ba la wan shongkai u Kpa kham shiphang la wan mih sa I Kmie jong ka. Ki ia shongkai lang hangta khrui . Hadien shiphang ar phang ba la dep is pynbeit ithuh ithaw ka Lanosha ka sa nang leit buh um sha noh ha kamra shet ja. Kumjuh ruh ka la nang pynsyaid lypa sa ka ja bad jyntah.

U Bah Malki u la nang ia shongkai lyngngai bad u Kpa kumjuh ka Kmie ka Lanosha. Hangne ki ia kylli pyrthew bniah ban tip bha shaphang ka kur ka jait bad ka iing ka sem. U Kpa ka Lanosha uba long shisur u la kmen eh ban iohi ruh ia u Bah Malki namar u long u briew uba kynjai.

“Nga sngew tynnat bha ka jingwan mih kai jong phi kumne…” La ong u Kpa ka Lanosha

“Hooid kein la slem ba I Lano I khot tang ba nga khlem ioh por bad buh teng man ka por…” La bynrap ktien sa u Bah Malki

Katba kine ki dang ia bun ktien la wan mih ka Lanosha bad ka sha ha ka tre, ka wan buh top ha lor ka miej ka ba don hangta ha khmat jong ki.

“Ade kumno shuh ngan dih namar dang shu dep eh kumto kumto mynta ha iing I Daplin…” La pynpaw u Bah Malki

“Dih phi…. Peit mo ka ja ruh nga khreh kyrpang ia phi… Phi dei ban bam ..” la phai ktien pynban ka Lanosha

“Hooid kein … Naduh mynne ka bapli I Lanosha I la bunkam ban shet hana ba phin bam maphi…” La pynbud ktien lem sa I Kmie ka Lanosha

U Bah Malki um don ktien shuh ban ong da kumwei, u la shu rkhie noh.

“To shu leh noh kumne, lada phi long te shu wan rah lang noh kein bad kata ka ja ruh ba ngan ban syndon khnang ban kham kloi…” La ong pat u Bah Malki

“Em phi to sa bam pat ynda la dep dihsha bam ja miet syndon kein.. balei ban kyrkieh ha ba mynta la miet hi te…” Phai ktien ka Lanosha

Ha kane ka jingkren ka Lanosha u Bah Malki u la hap ban pyndem noh toin.

Kumba la ai jingmut ka Lanosha u Bah Malki u la hap ban bamja pat hadien shi kynta ynda la dep dihsha. Ka jing bang jong ka ta ka jingiashong hangta u la mih na iing ka Lanosha haduh khyndai baje ha kata ka miet. U Kpa ka Lanosha u la hap ban leit on lynti ia u haduh ba un da jan poi ha la iing sah.

Haba u kpa u la wan phai sha iing u la ong kyndit ia la ka khun

“Lano nga te nga da I hun ia uto u briew. Phi da phikir bha ia lade. Peit ioh phi lehkai ia u. U briew uba da I kynjai bad uba I lah ban shaniah…” U da shong bhek ha ka knot kaba don harud dpei.

“Phi mut ban ong kumno Pa…” La buh jingkylli ka Lanosha….

U kpa ka Lanosha u la nguid um biah bad ong ia ka

“Phi khun ngi ki kpa ki kmie ngi ju kwah ban ioh ia u pyrsa ne ka pyrsa ka babha ba miat…. Dei kata kein khun ba nga ong iaphi mynta …” U da peit sha ka la khun

Ka Lanosha ka sngewthuh eh ia ka jingmut u kpa hynrei ka shu dang sngew leh rain ban iakren shsphang kita kiei bad la u kpa. Hsngta ka kmie hi jong ka ruh ka ba shong harud dpei ka la kem ktien..

“Khun ka dei ba ong u kpa jongphi… Nga ruh nga peit itynnat ia uto u briew mynne uba da I bha Jinglong.”la ong ka Kmie

Ka Lanosha ka shu rkhie mian mian ia ka jingkren jong ki baroh arngut.

“Nga shu don hi ka jingiadei paralok tangba ngam pat nang ban ong kumno kumno ruh namar ngam pat iasngewthuh bha…” La pynpaw ka khun

U kpa u la kyndeh mynsiem haba iohsngew ia kata ka ktien.

“O kumta khun…” U la bynrap ktien bad u da peit sha ka

“Bad uto u briew te biang palat khun … Ngi te ngi suk ia u…”la bteng biang u kpa

Ka Lanosha ka la nangrkhie pashait … Namar ka sngew sammut ia kaei kaba u kpa jong ka u kloi eh ban pynpaw noh.

“Wat rkhie khun. Kam dei ba ngi shu kren… I Mei jongphi ruh I mynjur ia kata…”la ban ktien biang u kpa

“Hooid khun nga ruh kumba ong u kpa…” La pynpaw sa ka Kmie jong ka.

“To ih wei ba phi ong kumta lada ka thoh ka shyieng jong nga bad uto u Bah nga ngeit kan jia kumta … ” La ong pat sa ka Khun

“Sa phah wan kai biang khun…”la ong u Kpa

“To ih ngan sa ong….” La jubab ka khun

Ha kata ka miet hi ka Lanosha ka la pyrkhat kumno kan leh shaphang ka ba la pynpaw ha iing. Ynda ha jingthiah ka la ioh ia ka jing phun na u Bahdeng. Marsien iohi ia ka phun jong u, ka la kyndeh ka mynsiem . Ka jingkylli ka ba u Bahdeng u kylli nyngkong eh ka long

“Kumno ki ia ong ha iing…”

Marsien ioh ia kane ka jingkylli long kumba plie wang ia ka jingpyrkhat ka Lanosha ban ioh pynpaw ia kaei kaba ha iing ki iakren shaphang jong ka bad u.

“Bahdeng nga sngew kmen ba phi wan mynne kumto ha iing jong ngi. I Mei I Pa jong nga ki pynpaw ba ki I shaniah bha iaphi bad kim don Kano Kano ka jingsngew pyrshah ia ka jingiadei jong nga bad phi. …” La ong ka Lano

“Ka mut phi la iathuh ha iing ne…?” La buh jingkylli u Bahdeng

“Em phi nga khlem pat iathuh eiei ha ka jingshisha hynrei ki la ia pynpaw hi…”la jubab ka Lanosha

“Nga la I pher hi ka jingwan on lynti jong I pa jong phi mynne… Nga da I kmen bad I leh ieid bha ianga…” La iathuh pat u Bahdeng.

“O kumta mo….. Dei ka ta ka daw ba marsien poi ha iing I wan ong kyndit ianga kumta te phi nga sa shu lyngngoh …”La iathuh pat ka Lanosha

Ka mynsiem u Bahdeng ka la nang dap miar da ka jingsngew ieid ia ka Lanosha haba u ioh sngew ia kita ki ktien jong ka. Ka jingiakren ia khana jong ki ka la jrong jlang ha kata ka miet. U Bahdeng u la kular ruh ban sa wan kai biang ha ka sngi Thohdieng jong kata ka taiew.

U Bahdeng hadien ba u la sngewthuh ba ka jingiadei bad ka Lanosha kan long ka ba skhem noh, u la iaid sian ia lade ioh ba kane ka khubor kan poi noh ha ka tyndong shkor jong ka Kongthei Daplin. Hapdeng jong kata ka taiew u dang iakynduh lang bad ki baroh ar ngut ha ka Sngi Iew; tang ba um pynpaw pher eiei ia lade na ka jingiadei bad ki. Kumba long ha ki por ba la leit kumta ruh u pynpaw kumjuh.

Haba ka sngi Thohdieng ka la poi u Bahdeng u la leit mih sha iing ka Lanosha mynmiet khlem da kren eiei ia ka Daplin . Sor u iaid u da phong tupia ia lade da ka ba pyrkhat ban ym ithuh mano mano. Haba la poi ha iing ka Lanosha la pdiang burom ia u da ka kmie jong ka. Kumjuh ruh hadien kham shiphang la wan mih sa u kpa jong ka.

“Ade Bahdeng la wan…. Sngew tynnat kata…” La ong u Kpa ka Lanosha

“Hooid Pa… Nga sngew tynnat na kata ka daw nga sa wan biang…” La jubab u Bahdeng.

Hadien kham shiphang ka Lanosha ka la wan rah sha ia ki baroh ar ngut.

“Phi la da kloi sat…. Balei phi leh kyrkieh eh toi nga dang Shu dep na iing….” La ong u Bahdeng

“Dih seh hangne te ka dei la ka jong…..Ha iing te la ka jong kein…” La ban ktien sa ka Lanosha

“Dih phi haba I la da pynkhreh sa rat I sha …”La kem ktien sa u kpa ka Lanosha

Kumta ki ia dih ia ka sha bad iathuh khana artat. U kpa ka Lanosha u sngewthuh ba ka jingiakren bad u Bahdeng ka long ka ba myntoi shibun ia u namar u sngew ioh buit ban trei kam trei jam. U sngewthuh ba u long u briew uba shemphang shibun shah ban ia u.

Kumta u da pyndem sngew rit hi toin ia lade bad u da kwah eh ba ka jingpyrkhat jong u na ka bynta ka khun kan long ka ba seisoh.

Kumba la leh ha ka miet nyngkong kyndit katba dang ia muja ka shong kai ka Lanosha ka wan khot

“Ale noh ngin ia bamja… ” U Bahdeng u la ong pat

“Em phi nga te ngam lah shuh nga la dap ka kpoh…” U da kyrngah ka khlieh

Hynrei ka Lanosha ka la pyniap nia ia u

“Kumno shu kdang khlem pat bamja ….? Ne phim bang ne ban bam hangne ngi ba ia shet malu mala… Ki nongkyndong …” Ka da peit sha u.

“Ale Bahdeng ngin ia bam noh wei ba la khot…” La ong pat u kpa bad ka ieng artat nangta.

U Bahdeng u hap ban bud bad bamja hangta. Ha kata ka miet ruh u mih nangta haduh shiphew baje . U Kpa ka Lanosha u leit on lynti biang ia u haduh ban da poi ha I lad ba u shngain. [yn dang bteng]

– Advertisement –

Phi don ban ong eiei? Cancel reply