|
Khana babteng
“Em nga sngap ba phin kren maphi….” La phai ktien ka Lanosha
“O nga nang mut phi la dom….” Bynrap ktien pat u Bah Malki
Hadien ba la ioh sngew kumta ka Lanosha ka la sdang ban phai ktien ia u
“Bahdeng haba kumta phin leh kumno ia I Kongthei pat iba la wan wad hi iaphi….” Ka la buh jingkylli
“Ngan ong kumno Lanosha ia kata te tip shuh kein…” La phai ktien u Bah Malki
“Te lano phin wan kai shane ” La buh jingkylli biang ka Lanosha
“Ieh ia kata ngin sa is pynbeit…” La sawa ka sur na u Bah Malki
Hadien ba la ia sngewthuh ia kiei kiei ki sa ia buh noh artat ia ka phone.
Ha kata hi ka miet ka Lanosha ka sngewthuh ba khlem pep lada ka Kongthei ka tip shaphang ka jingiadei barieh jong ka bad u Bah Deng, kan sa dom. Hynrei watla katta ruh ka rai kut ban iaid beit sha khmat.
Ki sngi ki iaid ka taiew kawei hadien kawei pat ka leit ka wan. Ka jingiadei barieh jong ka Lanosha bad u Bah Malki ka la nang san. Katba ka Kongthei Daplin pat kam bna eiei ia kata. Ka Lanosha ka la leh sian bha ia lade ha ka iaid ka ieng bad ka Kongthei Daplin, hynrei pat kam shym la pynipher eiei haba ki iakynduh lang bad u Bah Malki. Kumjuh u Bah Malki u leh kumba leh ka Lanosha. Hadien ar bnai ba la sdang ka jingiadei bajan bad ka Lanosha u Bah Malki u iakut ban leit sha iing jong ki baroh arngut. Ka Kongthei Daplin Ka la pynpaw ka jingkmen ba u Bah Malki un wan kai ha iing jong ka. Kumjuh ruh katno tam ia ka Lanosha . Hynrei ha ka jingiapynbeit sop sop bad ka Lanosha ki iakren ba dei ban rung shuwa ha iing ka Kongthei Daplin.
Haba la poi kata ka sngi ka Kongthei Daplin ka la khreh la khrum bha jriang ia lade. Ka da pynbhabriew eh ia la ka met ka phad ka riam ka beit ha kata ka sngi. Kumjuh ka la pynkhreh ja ban ai ia u Bah Malki bad ka Lanosha ha kata ka sngi. Haba la poi u Bah Malki ha iing ka Daplin. Bran bran ka Daplin ka leit khot ia ka Lanosha ban ia wan shong kai lang. Ka Lanosha ruh kaba la tip lypa ka leh kumba shah shkor eh ia ki ktien ka Daplin bad wan mareh noh hi bran bran sha iing jong ka.
“Ade Bahdeng phi la poi…” La kren nyngkong ka Lanosha
“,Hooid kein nga dang Shu poi…” La jubab u Bah Malki
“I dang shu rung nga sawan khot iapha ruh…” La kem ktien Ka Daplin
“O kumta kein biang ban ia shong kai lang…” La ban ktien pat ka Lanosha
Katba dang shong hangta u Bah Malki u nang bishar ia ka jing iapher ki ar ngut. U iohi ia ka jing riam stai ka Daplin bad ki jingpynbhabriew jong ka ia lade. Katba ka Lanosha pat ka wan hangta kumba ka long.
Ka Kongthei Daplin ka la ieh iaki shi phang hsngta ban nang leit shet sha bad ki ar ngut ki la nang ioh lad ban pasiaw ia kaei kaba ki la ju iakren shaphang ka Kongthei .
Hadien ba la jah kumba katto katne por bak ka wan phai bad ka sha lai pela ha ka jingrah.
“Phi la da kloi shet sha…” La kren kyndit u Bah Malki
“Kan slem aiu phi … Tang ka sha…” La phai ktien ka Daplin bad ka buh artat ia ka sha halor ka miej .
“To ia dih noh….” Ka ong artat
Katba dang Dihsha ka Kongthei Daplin ka iathuh ba ka la pynkhreh ja ruh iaki. Marsien ioh sngew ia kata u Bah Malki u la ong
“Em phi wat leh kumta nga la biang tang ka sha namar nga la shet ja te ha iing..” u da kyrngah khlieh
“Em nga la shet te… ” La iasaid ka DapLin
Haba ym lah shuh ban iasaid nia u Bah Malki u la phah wan rah noh ban dih ryngkat bad ka sha. Kumta ka Daplin ka la hap ban leh kum ba u ong.
Hadien ba la dep bam dep dih. Ki la shong jah thait jar ban ia pur khana ia kane bad katai. Ka Kongthei Daplin ka la khot ia la ka Kmie bad ki para baroh ban khublei ia u Bah Malki. Katno ka jing sngewtynnat kata ka jingiakren hynrei watla katta ruh ki la hap ban tyngkai is ka por na ka bynta ka jingleit shongkai sa ha iing Ka Lanosha . [yn dang bteng]
|
Phi don ban ong eiei?