Wat iajan bad ki nongsain pyrthei, ong u Ma Mukhim ia ki nonghikai Eh ban pyntreikam, ba ka Garo kam hap ha ka ILP

Shillong,14 Risaw:
Ki Nonghikai jong ka Ri Lum Jaintia hapoh ka lama Jaintia Hills Govt. Primary School Teachers’ Association (JHGPSTA) ki la pynlong ia ka jingialang kaba san jong ki ne ka 5th Annual General Conference ha ka shnong Dawki ha Khasi Pnar Govt. L.P. School, Dawki ha ka 12 tarik mynta u bnai bad ha katei ka jingialang u MLA jong ka thain u ma Ste phanson Mukhim ula long u kongsan katba ka kong G. Pde, SDSEO ka Amlarem kala long ka symbud kongsan.
U ma Stephanson Mukhim, Parliamentary Scretary ka sorkar ba dei peit ia ki kam sport and Youth Affairs haba kren ha ka jingialang, ula buh ka jingkyntu ia baroh ki Nonghikai skul jong ka Ri Lum Jaintia ba kim dei satia ban shim kabu ia ka jinglong iajan jong ki bad kino kino ki riew sain pyrthei (Politician) haba u ong bak ajingiajan jong ki bad ki nongsain pyrthei ka wanrah ia ka jingdkhot ha ki kam hikai jong ki.
U ong ba don katto katne ki Nonghikai kiba don ka jingiajan bad ki nongsain pyrthei kiba la bun kam sa tang ka iabeh kam shawei bad kane kala wanrah ka jingthut ia ki khynnah skul ha ki skul ba ki hikai.U ma Stephan haba kren shuh shuh ha kane ka jingialang ula iaroh ruh ia ki Nonghikai naduh kito kiba la shongthait na ka kam hikai haduh kiba dang don mynta, namar ba ki long kum ki nongsaindur ia ka lawei ba phyrnai jong ka ri bad ka jaidbynriew. “Dei ka jingdon jong phi ki
Nonghikai, ba nga la lah ban long kumne kumba nga long” haba pynpaw ia ka jingsngewnguh sha baroh ki Nonghikai. U la khot ruh ban don ka jingiatreilang hapdeng ki Nonghikai bad ka sorkar khnang ban yn lah ban pynioh ia ki jingdonkam bapher bapher jong ki Nonghikai bad ruh ha
ki skul. Ula kyntu shuh shuh iaki Nonghikai ba kin nang trei shitom ban nang pynmih shuh shuh ia ki khynnah skul kiba long kum ki khlur ba phyrnai.
Hakatei ka jingialang u Ma Mukhim u la kynthoh khyndiat halor ka ILP kaba long ka dawbah jong ka jingiakhih ha kine ki sngi ha kaba u la ong ba kum ki nonghikai ki dei ban sngewthuh ba ka long kaba eh ban pyntreikam ia ka ILP hapoh ka jylla, namar ba ym lah ban pynhap lang ia ka Ri Lum Garo ha ka ILP namar ba kam shym hap hapoh ka Bengal Eastern Frontier Regulation Act 1873. Ha katei ka sngi u kongsan ula pynnoh ruh ia u synniang sha ka seng ki Nonghikai bad ula sam ruh ia ki jingai sngewbha sha ki Nonghikai kiba la shongthait. Kiwei de kiba la ai jingkren ki kynthup ia ka kong G. Pde, Sub-Divisional School Eduction Officer, Amlarem, ma T. Rymbui, Secretary War Unit bad ruh na u N. Hadem, President ka seng uba la pyniaid ia ka jingialang bad uba la ai ruh ia ki kyntien ai pdiang. Kham ha shwa la ioh ruh ia ka jingrwai pdiang na ki Nonghikai jong ka War West Unit. Na ka liang ka seng kala ai ruh ki jingai sngewbha ia u ma Mukhim.