Wat ia ki soh kwai, ym ithuh shuh, uba im ne uba ih, ba sop ki pumpum, ha shilynter ka surok bah na Shillong sha Dawki

Da U bah RM Shabong

Baroh baroh ki ia ujor, halor ka jingsniew tasam, ka surok na Shillong sha Dawki, hynrei, kumba katto katne bnai mynshwa, nga la leit, shaba iap briew, sha ka shnong Kongwang bad ha shwa ban poi ha shnong, nga la leit shabar sharud jong ka surok bah; hynrei, mar ia dei ki juti ha ki niut kiba don harud surok, ka stem hi shait ka patlun baroh kawei, namar ba la satah da ka pumpum suda bad ka jingleit jam sharud surok, ka la pynkylla rong bad pynjaboh, ia ka patlun bad ia ka juti, kat haduh, ba la hap ban sait malu mala da ka um, ban leit ka paw lehrain sha shnong ki briew. Lada ka leit jia kumta, tang ia uba kam sharud surok, kumta katno tam, ia kito kiba leit trei bri bad kiba hap shang ia ki bri jongki baroh shisngi, ha kaba ka pumpum, ka la tap lut khoit ia ki dieng kwai bad baroh ki dieng kiba don ha kitei ki rud surok.

Ha shwa kata, nga iakynduh ki paralok kiba na ka shnong Umkrem bad ha ka jingiakren, ki iathuh khana, ba namar ka jingsniew tasam jong ka surok, kumta ka pum pum, kam shym leit dem satia, tang ha ki niut kiba harud surok, hynrei, ki leit dem haduh ha kliar jong ki dieng kwai bad la iathuh, ba ha kine ki sngi, haba leit ot kwai, la shu hap ia leit antad, namar ba ym ithuh shuh, ia u kwai, uba la ih ne uba dang im ruh, namar ia ki symboh kwai, la sop lut plain da ka pum pum.

Khyndiat sngi mynshwa, nga iakynduh ia kiba shong iing, ha syndah ka surok Madan Langtad, kaba lah ban dei ka jaka kaba pum pum tam, ha katei ka lynter surok bad ki iathuh, ba baroh shisngi kynthih, ki ring mynsiem, da ka pum pum suda bad kaba sngew synei, ka long ia ki khun rit jongki, namar ba ka pum pum, ka leit rung sha iing shet ja, sha kamra thiah bad sha kamra sum ruh kumjuh. La iathuh, ba wat ka um ruh, sha kitei ki jaka, ka la sop, da ka pumpum suda bad kaba sngew sangsot, ka long, ba wat lada ki tap, da ka musari ha ka por ba thiah, hynrei ka pumpum, ka leit rung sha ki musari bad ynda la khie mynstep, la iohsngew sharud jingthiah, ba la tap da ka pumpum suda bad katei ka long kaba ma bad kaba lah ban ktah jur ia ka koit ka khiah, khamtam ia ki khyllung kiba rit.

Katei ka dei ka jingim kordit ia kiba shong ba sah harud katei ka surok bah, khlem da iakren sa ia kiba leit ba wan, kiba hap ban sohkhrai ki jingshong jongki, na ka jingshah syngngeit ha ki maw surok, naduh na Dawki haduh harum Laitlyngkot.