Nongpoh: Shisngi hadien ba ka FKJGP, Sohkhwai Umdu Unit, ka la pynpaw paidbah ba ki pyrshah jur halor ka jingthmu ka Ri-Bhoi Tourism & Environmental Development Forum (RBTEDF) ban pynlong ia ka jingiakop khwai ha Wah Umtrew ha Lailad, hynrei hynninka sngi ki nongkitkam jong katei ka RBTEDF, lyngba u Bah Plielad Tiewsoh, ki la mih ban pynshai paidbah da kaba ong ba ka jingthmu ka RBTEDF ban pynlong ia katei ka jingiakop khwai, kam dei halor ka jingthmu ban kamai pisa, pynban ka jingthmu kaba hakhmat hi ka long ban pynsngew thuh paidbah halor ka jingdonkam ban pynneh pynsah ia ki dohkha kiba don hapoh katei ka Wah.
Haba batai halor katei ka jingiakop Khwai, u Bah Plielad Tiewsoh, u la ong ba ha ka jingshisha katei ka jingiakop khwai ka la dei ban pynlong naduh ka 26 tarik u Risaw, hynrei ha katei ka sngi namar ka jingpynthut ka mariang, la pynsangeh noh bad la rah noh sha ka 9 tarik mynta u bnai bad ha katei ka 26 tarik, na ka liang ka RBTEDF ka la pynlong ia ka prokram hikai paidbah ban pynsngewthuh halor ka jingkordor ka mariang bad ki jingthaw ba im baroh bala wan ruh ban shim bynta naduh ka Deputy Commissioner ka Ri-Bhoi District bad ki ophisar naki tnad sorkar bapbher bapher ka Ri-Bhoi.
Ka RBTEDF, ka da angnud shisha ban pynneh pynsah ia ki dohkha ha katei ka Wah bad na kata ka daw kaba la pynlong ia katei ka jingiakop khwai, kaba long ruh kum ka jingpynsngewthuh sha baroh ki rawon, ba ki dei ban sumar ia ki doh ha ki wah ym ban dusmon lane shimkabu da kaba bret jar, khang jar bad pyniap beain da kaba ber da ki kynja dawai bih lane kawang bom.
Haba pynshai halor ka jingkren u President ka FKJGP Sohkwai Undu Unit u Samla Banroy Wahlang, uba la ong ba katei ka RBTEDF kam shem theh dohkha bad pynneh lane sumar ia ki dohkha ha katei ka wah, u Bah Plielad Tiewsoh, u la ong ba ka seng ka kwah eh ban theh dohkha ha katei ka wah bad halor kata ka la leit ruh ban iakren ia ki ophisar ka tnad Fishery, hynrei na ka liang ophis jong ka Fishery, ka la ai jingmut ba ha Wah Umtrew kaba don ha Lailad dei ban thep da ki ‘Khasaw’ ym da ki kha pung bad halor kata na seng ka la shimkhia ban wad ia ki lad ki lynti na ka bynta ban ioh ia ki Kha saw, khnang ban ioh buh hapoh katei ka Wah.
Halor ka jingkynnoh ka FKJGP ba ka Forum ka shim bai khwai haduh T.500/-, u Bah Plielad u la ong ba na ka liang ka Forum ki la rai ban pynhiar ruh ia ka dor tiket sha ka T.300/- ban ia pyrkhat lem ia ki nongkhwai kiba duna ka jingioh.
Kumta wat hapdeng ka jingpyrshah ka FKJGP, na ka liang ka RBTEDF ka la rai ban pynlong beit ia katei ka jingiakop khwai, namar ka RBTEDF kam don jingthmu ei ei ban kamai, hynrei ka synjuk hi ka don ia kata ka jingthmu ban pynsngewthuh paidbah, halor ka jingkordor ban pynneh pynsah ia ki dohkha kiba don ha katei ka Wah, u la bynrap.
Phi don ban ong eiei?