Nongpoh:Wat hapdeng shibun ki jingpyrshah na ka Meghalaya, halor ka jingtei ka Assam ia ka Transit Camp ha Khanapara, kaba dang hap hapoh u pud u sam ka Raid Marwet, Ri Bhoi, hynrei ia kaei kaba la iohi mynta ka long ba ka Assam kam shym la pynsngap ia ki nia bym shongnia na ki riew pyrshah na Meghalaya, pynban ka la iai bteng ban tei ia katei ka Transit Camp kaba don ha katei ka jaka.
Na kaei kaba la lap haduh mynta, la iohi ba ka jingthmu ban tei ia katei ka Building ka la iaid shaid shaid bad haduh mynta ki nongtrei ha katei ka jaka, ki dang bteng ban trei ia ki kam ki jam bad mynta lei, la iohi ba ki la mut ban shna kham bha shuh shuh ban ia kaei kaba long ha kine kiba la dep noh baroh.
Haba iadei bad katei ka Transit Camp ha Khanapara, dangshen la iohsngew ia ka sur jingkren na u Bah Victor Ranee, MDC ka Jirang, uba la pynpaw ka jingwantei ka Assam ia katei ka Transit Camp ha katei ka jaka, ka la pynkhihwin shikatdei eh ia ka District Council bad kaba la pynlong syndon ia ka District Council ba kan phah jingthoh sha ka sorkar Assam, na ka bynta ban pynsangeh noh syndon halor katei ka jingwan tei beain ia katei ka Building.
Ym tang kata, dang shen ki heh ka Party Congress kaba kynthup naduh ki MLA bad MDC, ki la leit ban jurip ia katei ka jaka bad haba ki la ioh ban iakren bad ki briew kiba la don ha katei ka jaka, ki la sngewthuh shai kdar ba katei ka jaka ka dang hap hapoh u pud u sam ka Raid Marwet, Ri Bhoi Meghalaya.
Nalorkata, ki la don ruh ki kynhun sengbhalang kiba la pynpaw ia ka jingpyrshah halor katei ka jingwantei Building ka Assam ha katei ka jaka, da kaba pynpaw ba katei ka jaka ka dang dei hapoh u pud u sam ka Meghalaya bad kiba la pynpaw ruh ba katei ka jingwan tei Building ka Assam ha katei ka jaka, ka dei tang ki kam buittuh ka Assam ban kyntur ia u pud u sam ka Meghalaya.
Phi don ban ong eiei?