Wat ha ka jingiap ruh, hynrei ka mynsiem U Ziona ka Mizoram, ka bynnud ban leit noh

Wat la ki doktor, ki la pynbna iap ia U Ziona, hynrei, la imat, kumba ka mynsiem jongu, ka dang sdien hi ldoi ha ka met jongu, namar ba kiba ha iing, ki lap ba ka met jongu, ka dang syaid malu mala bad dei na katei ka daw, ba ka jing leit on tep, ia U Ziona, uba dei u shynrang, uba bun tam ha ka pyrthei, kam shym la urlong satia, hynnin ka sngi bad la buhteng shwa, da kiba ha iing jongu.

U Ziona, uba don 76 snem, u dei uba don ia ka longiing kaba heh tam ha ka pyrthei hi baroh kawei bad u khlieh ruh ia ka niam, kaba la ai kyrteng Lalpa Kohhran thar, kaba la seng da u kni jongu, U Khuangtuaha, ha u snem 1942.

U Secretary jong katei ka niam, U Zaitinkhuma, u iathuh, ba la hap ban buhteng shwa ia ka jing leit on tep, ia U Ziona, namar ba ula sdang khih mynsiem biang, hadien ba la pynbna, ba ula iap ha ka Sngi U Blei ba ladep. La test ia ka met jongu, da u Oximeter bad la lap, ba ka mynsiem, ka dang tied malu mala. “Ka met jongu, ka dang khluid malu mala bad kumta ki trai iing, ki bynnud ban tep ia u, ha kane ka jinglong ka met” ula ong shuh shuh.

Ki doktor ka Trinity hospital ha Aizawl, ki pynbna ba U Ziona, ula iap ha ka por 3baje nohsngi jong ka Sngi U Blei bad la leit rah ia ka met jongu, uba la dep iap lypa ha iing.

U Ziona, u don 39ngut ki tnga bad 90ngut ki khun bad ka niam jongu, ka don ia 2,500ngut ki dkhot na ki 433 tylli ki long iing bad ka dei ka niam, kaba hikai ia ki shynrang, ba kin ri bun tnga.