“Wat Duh Jingkyrmen”

Carmel Fedrick Malngiang

1. Ha pyrthei shibun ki jingeh ngi mad,
   Katba shaphrang ngi nang ïaid;
   Jingkhuslai, jingduh jingkyrmen,
   Ïa kita ngim lah ban len;
   Kawei ba ngi dei ban kynmaw,
   Ban d’wai sh’u Trai Nongthaw.
2. Jingpynshoi kiba har-rukom,
   Ïa jingim ki wan thom;
   Jing-pynbyrngia kiba khyllah,
   Ïa ngi ki phon ki pah;
   Ki pynthame, ki pynbakla,
   Bad ki pynjot pynpra.
3. Shibun ki at shibun ki them,
   Jingim ka hap ban thom;
   Ngi hap ban shah ïa jingtyrha,
   Kumjuh ï’u slap u phria;
   Teng teng halor u shiah ba thar,
   Ngin thom ban poi sha kliar.
4. Sha kliar to thom khlem kynran dien,
   To tur wat ar-tatien;
   Haba ngi don ïa mon-ba-jwat,
   Jingeh baroh ngin prat;
   Lynti ba khim bunsien ka lam,
   Sha ki kliar lum ka nam.
5. Ha man ki mawjam ka jingim,
   Ïengskhem hala nongrim;
   Ka mon ka diang watla ki phon,
   Ki thap ban pynkyllon;
   Kum dieng bilat to ngin ïeng shkhem,
   Kyrmen ba ngin ym rem.
6. To kiew shaphrang, to minot thop,
   Ban ïoh ï’u soh jingjop;
   Bunsien ki jingeh, jingïaleh,
   Tang shiphang por ki neh;
   Hadien ka miet ba dum synñia,
   Ju wan ka step phyrnai!
7. Te kumta ‘lei ngin diaw mynsiem,
   Ngin sngew duh-jingkyrmen?
   Hapdeng shibun ki jingïaleh,
   Ban phai dien noh wat treh;
   Barobor to long shkhem jingmut,
   Ïaineh haduh ba kut.
8. Jingjaw ummat bad jingjaw snam,
   Ïa ngi kin sa ai nam!
   Jingtrei shitom bad jingminot,
   Ïa ngi kin sa tei mot!
   Wat duh jingkyrmen te la dei,
   Ban mad ïa jingshyrkhei!

Khublei shihajar nguh