Wat ailad ia ka BJP, ka Reliance ka shim bai konekshon T3 hajar, ong U President MPCC

Shillong: U President ka Meghalaya Pradesh Congress Committee (MPCC) u Dr Celestine Lyngdoh u la ther ia ka BJP da kaba kynnoh ba ka la ailad ia ka kompeni Reliance ba kan kamai spah na ki paidbah.
Haba kren myn hynnin ka sngi sha ki lad pathai khubor ba la don lang u MP u Bah Vincent H Pala, u Dr Celestine u la ong ba ka Reliance Company haba ka wan sha Dong Mihngi ban ai konekshon mobile kala shim T.3000 tyngka na uwei bad ka da kular ban pynphai noh ia kane ka pisa, hynrei haba ka mih na Dong Mihngi ka khlem pynphai ia kane ka pisa sha ki paidbah.
U la kynnoh da kaba ong, “La don palat shi klur ngut ki briew bala shim ia ka Reliance konektion shaei ka jah kane ka pisa, hynrei ka sorkar BJP ka dang ia trei kam bad kane ka kompeni”.
U la kynnoh ruh ba ka sorkar BJP ka la pynkylla ia ka CBI kum ka kam thamula.
Da kaba kyntu ia ki paidbah ban kiar na kaba jied ia ka BJP, u Dr Celestine u la ong ba ha kane ka kynti, ki paidbah ki dei ban kyntait ia ka BJP.
U la pan jingkyrshan ia u kyrtong ka Congress, u bah Vincent H Pala na ki paidbah ha kane ka kynti kaba mynta ban biang ia ka jingshaniah jongki.
U President ka MPCC u la ong ba ha kane ka sorkar BJP, ka la pyntroin ia ka ioh ka kot, ka ioh kam ioh jam bad ka BJP mynta ka la shu pynbiej ia u paidbah ban kam ba ki “Chowkidar”.