Wat ai jamin ia u nongpyniap, ong ki longkmie Mawlangsu

Shillong, 23 Jylliew:
Ha kaba ia dei bad ka jingjia shah pyniap dusmon kawei ka long kmie na ka thain New – Mawlangsu kaba la jia ha ka 15 tarik mynta u bnai, ka ba la pynkhih win ia ki paidbah nongshong shnong jong ka thain Mawlangsu hi baroh kawei, wat la u runar u ba la don kti ha katei ka kam bymman u la leit ban pyndem noh ia lade sha ki bor jong ka ain hynrei ha ka sngi Palei da ki phew ngut ki longkmie hapoh ka jingialam jong ka Synjuk Ki Seng longkmie Malangsu Area, kila hiar sha ka ophis trei kam jong u Superintendent of Police bad kumjuh sha ka ophis jong u Deputy Commisioner ka West Khasi Hills na ka bynta ban dawa ba kin nym pyllait jamin ia u tei u runar bad dawa ba kin tohkit bniah ha kaba iadei bad katei ka kam khnang ban lap shuh shuh ia kiwei kiba don kti lang ha katei ka kam bymman.
Kum ban shu pynkynmaw ba katei ka longkmie kaba la tip kum ka Bliantina Lyngkhoi 40 snem, kala shah pyniap da kaba kala shah tied dusmon da u mohkhiew na ki bynta jong ka khlieh ha u wei u runar u ba la tip kum u Kiasstar Wahlang u ba la don mynta ha ka kti jong ki pulit ka Nongstoin. Katkum ka tyllong khubor bala ioh lum na ki nongshong shnong katei ka shnong la ong ba katei ka longkmie kala ieh noh shadien ia ki 8 ngut ki khun kiba dang hapoh ka 18 snem ka rta bad ha katei ka sngi shwa ban jia katei ka jingjia katei ka long kmie ka don ha kawei na ki jaka bylla ka jong ka, namar hadien ka jngkhlad noh u lok jong ka, kam banse ban leit bylla tang ban ioh pyndap ia ki khun ki kti, hynrei ha katei ka sngi u tei u riew thrang snam u la shim syndon wat ia ka jingim ka jong bad ia ka daw ba tikna haduh mynta ym shym pat la lah satia ban tip.
Na ka liang jong i kong Batskhem Lyngkhoi President Synjuk ki Senglongkmie Mawlangsu Area, i la ong ba ka jingiamih paidbah ka jong ki ha katei ka sngi ka long ban kyrpad ia ki bor jong ka ain ba ki dei ban bishar hok ia ki riew shim kabu namar kumba ka ju long bun sien kum kitei ki riew shim kabu haba kila shah kem tang hadien katto katne por kila lait bad ioh jamin noh na ka jingshah pynshitom bad katei ka wanrah ruh ia ka jingma khamtam ia ki longkmie bad ki khynthei hadien habud namar ba ka lah ban jia shuh shuh kaba kham shyrkhei namar ka jingioh iaid lait lan kiba kum kitei ki riew bymman.