Wanrah U CEM, ka mang ba T.201 klur, na bynta u 2017-2018

Shillong, 20 Jylliew:
U Chief Executive Member ka KHADC u bah Pynshngaiñ N Syiem u la wanrah ia ka mang tyngka kaba T.201,59,30,220 klur tyngka (Arspah wei klur san phew khyndai lak lai phew hajar arspah arphew tyngka) na bynta u 2017-2018. Katei ka mang tyngka ban pynlut ka kham heh ban ia ka jingmang ban pynmih kaba long T.201,58,90,090 tyngka. Katei ka dei ka mang tyngka kaba pura ka KHADC, namar ba ka vote on account na bynta ka lai bnai kan sa kut noh.
Ha katei ka mang tyngka la mang ruh na ka bynta ban siew bai bam tymmen ( Pension) ia ki MDC barim bad yn sdang ia katei ka jingsiew naduh u bnai naitung bad katto katne percent ia ka Arrear jong ki bad katei ka mang tyngka ka dei lyngba ka jingkhmih lynti ba ka sorkar jylla kan pyllait ia ka pisa ba ka Council ka dang dei ban ioh lyngba ka bhah jong ki mar pohkhyndew.
Ha ka jingkren mang tyngka u CEM u la pyntip ba ka sorkar jylla ka la thung ia ka Commission on the 5th Pay kata ban pynkiew ia ka tulop ki nongtrei sorkar bad halor kane u CEM u la ong ba ka Council kam tip lano ka sorkar kan sdang ban pyntreikam bad halor kane u la ong ba ka District Council ka la pynkhreh lypa bad kan sdang pyntreikam tad haduh ba ka sorkar jylla kan sdang pyntreikam.