Shillong: Sa shisien pat ka long kaei kaei kaba sngewsarong ban iohi ba ki khun samla khamtam na ka ri Khasi-Jaintia jong ngi ki la nangkiew ha ka liang ka kam ialehkai sport, bad man ka sien ba ki leit mih khmat la ka long ia ka jylla ne na ka bynta ka ri, ki ju wanrah ia ki takma.
Ha kane ka kynti ba mynta ka long ruh ka burom ia ka Meghalaya Jeet Kune do Association, ia ka jylla bad ka ri hi baroh kawei, ha kaba lai ngut ki samla na kane ka jylla kiba leit mih khmat ia ka ri ha ka International Jeet Kune do Championship 2019 kaba la long ha 27 tarik bad kan kut ha ka 30 tarik mynta u bnai, ha Alhaj Mokbul Hossain University college, Dhaka, Bangladesh ki la ioh ban khur takma.
Kitei ki lai ngut ki samla ba leit mih khmat ia ka ri na ka jylla jong ngi, ki long u Francis Ricardo Ranee Songthiang, u Ferdinand Suchiang bad ka Ribhalin Marbaniang, hapoh ka jingialam jong u Donny Ranee bad u Gemansingh Warjri.
Baroh lai ngut kitei kiba la leit mih khmat na ka jylla jong ngi ki la ioh ban wanrah ia ki takma, ha kaba u Francis Ricardo Ranee Songthiang na Laitkor Kynton-u-Mon, uba dang shong klas XII, u la jop ia ka takma ksiar ha ka 57 kg weight Category FC, u Ferdinan Suchiang na Dongmihsngi Ladthadlaboh, West Jaintia bad ruh uba trei ha Civil Defence and Home Guards u la ioh ban khur ia ka takma ksiar ha ka Jeet Kune do Form Competition, katba ka Ribhalin Marbaniang pat kaba shong ba sah ha Lumparing ba dang pule klas VIII, ka la khur ia ka takma rupa ha ka 45kg weight Category LC. Kane ka long katkum ka kyrwoh na u bah D.R. Ranee uba long u nongseng ia ka Jeet Kune do bad ruh uba bat kum u General Secretary jong ka MJKA, bad u Vice President ka All India Jeet Kune do Federation.
Phi don ban ong eiei?