Wanrah nyngkong ka Congress ia ka CAB naduh u snem 1947, kynnoh u Dr Jemino

Shillong: U kyrtong MP ka Meghalaya Democratic Alliance (MDA) uban iakhun na ka shap ka UDP u Dr Jemino Mawthoh, u la kynnoh ba ka dei ka Congress kaba la wanrah nyngkong ia ka Citizenship Amendment Bill (CAB), kaba la pynkhih sa ka ka BJP ban pdiang nongshong shnong ia ki Hindu, Parsi, Buddist, Jain, Sikh bad Khristan kiba dei na Afghanistan, Pakistan bad Bangladesh.

Haba kren sha ki nongthoh khubor hadien ba la dept hep kyrteng, u Dr Jemino u la ong ba ka Congress kam don eiei ban kynnoh ia kane ka sorkar MDA bad ki shu kynthah ia ka MDA ba don bad ka BJP hynrei dei ban sngewthuh ba ha kane ka por ka dei ka juk iatreilang ka sorkar.
“Ka BJP bad ka Congress ki la iatreilang ha District Council (JHADC), balei ki kynnoh ia ngi bad balei kim kren ia ki mat ba donkam jong ka jylla, ki jingeh jong ki paidbah balei ki lapmiet ban kren ia kine ki kam”, la ong u Dr Jemino.
U la ong ba ia ka Citizenship Amendment Bill (CAB) ruh, dei ka Congress kaba la wanrah naduh u snem 1947 bad la buddien ka BJP ha kine ki sngi.
“Ia ka CAB la wanrah da ka Congress naduh u snem 1947 bad u Manmohan Singh u la kren ia kane ha Rajya Sabha ha ka por ba u long Myntri Rangbahduh ka ri”, u la ong bad bynrap, “ka Congress ka shu pyrshah leh mynleh ia kane ka Bill ha Rajya Sabha dang shen tang ban pyni ia ki paidbah ba la jan ka elekshon”.
Ha kajuh ka por, u la kynnoh ruh ba ka jingkhang shohdoh masi, la sdang ka Congress. “Ka Congress ka dei ka party kaba la pynmih ia ka hukum ban khang bam doh masi ha ka por ba long myntri rangbahduh ka Indira Gandhi bad ka shap jongka ruh, ka dei ka masi mynshwa, ym dei ka kti”, u la kynnoh u kyrtong ka MDA.
U la ong ba ka Congress bad ka BJP ki dei ki ar tylli kiba leh lang ia kijuh. ” Kaei kaba leh ka BJP, ka Congress lei ka la leh ha ki snem ba la dep”, la kam u Dr Jemino.
U la ong ba ki paidbah ki dei ban jied ia ki seng trai ri kiba sngewthuh ia la ka jingeh lajong ym ban wan batai kiba na Delhi.
“Ngi kum ki trai jaka ngi sngewthuh khambha ia ki jingeh jong ki paidbha, ka jylla bad kaei kaba dei ban iahap bad iabiang ia ka jylla lajong ym da ki seng national party kiban wanrah da ki rukom leh rukom pyrkhat jong ki hi. Ngi sngewthuh kham bha ban ialade, ngi tip ban synshar hi ban leh hi balei kin batai na Delhi”, u la ong.