Wanrah ka sorkar da ka Ordinance, ia ki iing ba bun trai

Shillong, 15 Nohprah:
Ka kynhun ki myntri sorkar jylla mynta ka sngi ki la mynjur ban wanrah da ka Aiñ ia ki ing kiba don bun trai tang ha kawei ka mala, katei ka aiñ ka dei kaba la tip kum ka Meghalaya Apartment Ownership, Ordinance 2015, katei ka aiñ ka long ban buh da ki kyndon ia ki jinglong trai ki trai ing ia ka ing kaba don ha ki mala kiba bun. “Ngi la mynjur ia katei ka aiñ Meghalaya Apartment Ownership Ordinance 2015 na ka bynta ban pyniaid beit ia ka jinglong trai ki riew shimet ia ki ing kiba don ha ki mala kiba bun ha kane ka jylla” ong u myntri rangbah ka jylla u Dr.Mukul Sangma.
Katkum ka jingong u Dr.Mukul u la ong ba ka sorkar ka i ba la don kam ba kan don noh ka jingpyniaid beit iaid ryntih ia katei ka jinglong trai ki briew namarba mynta kiba kum kitei ki mala ba don bun trai kila sdang ban ieng ha ka nongbah bad kiwei pat ki district jong ka jylla. Katba ka kong Ampareen Lyngdoh pat ka la ong ba ka jingthmu ban wanrah ia katei ka Aiñ ka dei namarba katei ka Aiñ kan batai sha ia ka jinglong trai jong ki briew ia ka ing, ka jingdonkam jong ki ban peit ia ki jingpynbit pynbiang, ka jingdonkam ba kin don kajuh ka jingkitkhlieh bad ka jingnoh synniang kaba katjuh para ba ia sahlang.
Ka kong Ampareen ka la ong ruh ba ka jingdon katei ka aiñ kan iarap ban ai ia ki jingkhein jingdiah kiba biang na ka bynta ka jingrejistar bad kan iarap ruh kumno ban pynshitom ia kiba pynkheiñ ia ki kyndon aiñ. U Dr.Mukul pat u la ban biang ba katei ka aiñ kan iarap ia ka sorkar ban peit ba ka Meghalaya of Land Transfer Regulation Act, 1971 kan treikam bad kumjuh ruh ka jinghiar pateng jong ki nongioh pateng kan iaid beit iaid ryntih.