Wanrah biang u CEM ïa ka Clan Bill, hapoh Ïing Dorbar KHADC

Shillong:Mynhynnin ka sngi, u Chief Executive Member (CEM) jong ka KHADC, u Bah Titosstarwell Chyne, u la wanrah biang ïa ka “Khasi Hills Autonomous District (Khasi Social Custom of Clan Administration) Bill, 2018.

Haba wanrah biang ïa kane ka Bill, hapoh ka ïing Dorbar, u CEM jong ka KHADC u la ong ba ïa kane ka Bill la wanrah hapoh ka ïing dorkar ha ka 20 tarik, Naiwieng 2018 bad la pdiang ïa ka ha ka 22 tarik, Naiwieng 2018 bad la phah sha u Lat jong ka jylla ban pan ïa ka jingmynjur.

Haba ïadei bad kane ka Bill, u Lat ka jylla u la phah biang sha KHADC ryngkat ka jingthoh ha ka 6 tarik Jymmang 2019, ban bishar bniah, ïa kane ka KHADC ka la thaw ïa ka kynhun peit bniah kaba kyrpang ïa kaba la tip kum ka “Advisory Committee on Law and Traditional Affair” ba kan peit bniah ïa kane ka Bill.
Katei ka Committee ka la shong bun bunsien ha kaba bun bah ki jingiashong pyrkhat kam ha kaba la bun kiba wan ban ïashimbynta ha ki jingïalang bad ïa kane ka Bill la pynshong nongrim kum ka jaitbynriew kaba shim jait na ka kmie.

Ka Committee ka la phah ïa kane ka kaiphot halor kane ka bill sha ka Executive Committee bad hadien ba la ïoh ïa ka kaiphot, ka la shong pyrkhat bniah bad mynta ka wanrah biang ïa kane ka Bill hapoh ka ïing Dorbar hadien ba la wanrah katto katne ki jingpynbiang ha kane ka Bill.