Shillong: U chairman ka Lokayukta u Pranoy Kumar Musahary ula kyntu ia ki paidbah ka jylla ba kin wan buh jingujor sha ka Lokayukta haba ki lap ia kano kano ka jingbamsap ne jingpyndonkam bakla ia ka pisa jong u paidbah da ki ophisar sorkar.
Haba kren mynta ka sngi hadien bala shimti kum u chairman ka Lokayukta u Pranoy Kumar Musahary ula ong, “Lyngba ki lad pathai khubor nga kwah ban kyntu ia ki paidbah ban wan buh jingujor sha ka Lokayukta khnang ban tohkit lada don kano kano ka jingbam sap ne pyndonkam bakla ki ophisar sorkar”.
U la ong ba khlem kano kano ka jingujor, ka Lokayukta kan nym lah ban leh eiei bad ka donkam ban wan ai da ka jingujor haba don kano kano ka jingkynnoh ba don ka jingbamsap, ka jingpyndonkam bakla da ki heh sorkar. “Hadien ba ngi la ioh ia ka jingujor, ngan bthah ia u ophisar ban tohkit bad ngan pynmih ia ka hukum ryngkat ki dkhot”, u la ong.
Ia u Pranoy Kumar Musahary uba dei u nongbishar ba la shongthait, la pynbam smai da u Lat ka jylla u T Roy ha Raj Bhavan mynta ka sngi.
Da ka jingthung ia u chairman, ka mut ba ka Lokayukta kan treikam noh mardor watla kam pat don ki dkhot ba pura katkum ka ain ba la mynjur saw snem mynshwa ka Meghalaya Lokayukta Act, 2014.
Ha kajuh ka por, u Pranoy Kumar Musahary u la kyntu ia ka sorkar ban thung noh ia ki dkhot ba pura ka Lokayukta khnang ba kan lah ban trei noh ia ki kam bad ruh ia u ophisar pulit bym duna ia ka kyrdan SP shaneng ban shim ia ka jingtohkit halor ki kam bamsap.
“Nga dang don marwei tang kum u chairman , nga kyntu ia ka sorkar ba kan thung noh ia ki dkhot, secretary bad kumjuh ia u ophisar pulit bym duna ia ka kyrdan Superintendent of Police (SP) ban shim jingtohkit”, la ong u Pranoy Kumar Musahary.
Lah ban kdew ba ia ka ain Lokayukta la mynjur da ka sorkar barim ba ialam da u Dr Mukul Sangma ha ka iing dorbar hynrei ka khlem pat lah ban treikam namar ba kam pat ioh ia u chairman.