Wan tur bun spah ngut ki khar Bangla ban khlong maw

Dawki,12 Naiwieng:
Tang ar sngi hadien ba ki shipai iada khappud BSF ki la pynlong ka jingialang bad ki shipai iada khappud ka Bangladesh, da ki spah ngut ki khar Bangladesh ki la kiew mynta ka sngi ha Ghat Um syiem bad Ghat Dawki na ka bynta ban khlong maw na ki wah. Ha katei ka jingjia ki shipai BSF ki la shu peikai khlem leh eiei bad kam shym la don kano kano ka jingpyrshang na ki ban beh bad ban khanglad ia kitei ki khar Bangla kiba la wan da bun tylli ki lieng. Katei ka jingleh ki shipai BSF ka la pynsuba jur pynban ba lehse ka don eiei sha lyndet kaba pynshlur ia ki khar Bangla ban tur wat shaduh u pud u samka India, kaba bun ki artatien ba lehse ka lah pynban ban long ba ha ka jingialang ki shipai ki la ia pynbeit pynban ban ia shu ia sam noh ia ka bai ioh nong na ka jingtuh maw ki khar Bangla.
Ki shipai BSF ki la pynlong ia ka Flag Meeting jong ki bad ki shipai Bangla ha ka sngi thohdieng ba la lah na ka bynta ban wad ia ka jingiatreilang jong ar tylli kitei ki bor iada khappud ban khanglad ia ki kam pyntriem khamtam na ki kynhun lehnoh.
La ong ba katei ka jingailad ki shipai ia ki khar Bangla ban khlong maw katba ki mon, ka wanrah ka jingma kaba khraw ia ki paidbah namar ka jingkhlong maw na ki wah ka wanrah ia ki jingma ha ka umbam umdih bad khamtam ha ka level jong ka um kaba lah ban kiew sha ki shnong ki thaw. Ki paidbah ki la kyrpad ia ki bor ba dei peit ba kin shimkhia ban leh eiei halor katei ka jingjia khnang ba kana ym buh ia u paidbah ha ka jingeh.