Nongpoh: Ka long shisha kaei kaei kaba sngewsynei ban iohsngew ia ka jingeh kaba la iakynduh da ki paidbah Khasi bad khamtam eh na ki nongialam jong ki shong kiba don ha ki thain Block-2 khappud ka Meghalaya bad Assam, ha kaba kumba ka long mynta lei, kim nud shuh ban pynpaw pyrthei haba don kino kino ki kam kiba la wan leh jubor da ka sorkar Assam ha ki shnong kiba don ha katei ka thain.
Ka surok PGMSY kaba dang trei shaid shaid da ka Assam na shnong Jatalong sha Pamprah
Haba iakren bad u Rupang, ki nongialam shnong jong katei ka thain, ki la iathuh ba ka daw kaba la pynlong ia ki ban sngapjar ia kino kino ki kam kiba leh donbor da ka Assam, ka dei hadien ba ki la iohi ia ka jingbymshimkhia da ka sorkar jylla bad kawei pat kaba ki tieng ka long ba ki shah peit khmat ym tang ha ki bor Pulit ka Assam, hynrei wat ha ki kynhun Kaikhlaw ruh kumjuh.
Kawei na ki sakhi kaba shai eh halor ka jingbymnud saham shuh da ki paidbah bad nongialam shnong ha katei ka thain, ka dei halor ka surok PMGSY kaba la pyntrei da ka sorkar Assam ha shnong Jatalong, ha kaba wat la katei ka shnong ka dei kaba dang hap hapoh u pud u sam ka Raid Nongtung, hynrei ki paidbah bad ki nongialam shnong kim shlan shuh ban pynpaw ia ka jingpyrshah.
Kumno shuh ngin ong? Namar lada ka sorkar Meghalaya ka pynpoi ia ki shim pynroi sha kitei ki shnong, hynrei la ju wan pynpra beit da ki bor Pulit ka Assam bad hadien kata ym ju iohi dak ei ei ba ka sorkar Meghalaya kan shimkhia, hynrei lada ka sorkar Assam ka kyntur pud lyngba ki kam pynroi, ka Sorkar Meghalaya pat kam ju leh ei ei bad kane hi ka pynshlur ia ka Assam ba kan kyntur pud, ong kitei ki Rangbah.
“Lait sa tang ha ki kam bym lah kiar bad haba don ki jingjia kiba ktah ia ka iap ka im jong ki paidbah ngi nud pynmih kyrteng ha ki Kotkhubor, hynrei ngim nud namar ngi tieng ioh shah peit khmat ha ki bor Pulit bad wat ki kynhun Kaikhlaw kiba don ha katei ka thain” da kaba sngewkhia la pynpaw ki rangbah.
Watla dang shen ki shnong kiba don ha kane ka thain, ki la mad ia ka jingshah thombor ha ka Assam bad kata ka long hadien ka jingshah pynpra ia ka Iing skul ha Khliehumwang bad ki iiing Duk ha Umru, hynrei ka long pat kaei kaei kaba sngewlyngoh ba ha kane ka Dorbar Synrai jong ka Iing dorbar Thawain kaba dang shu dep shen, pynban ym shem la don wat tang uwei ruh u Nongmihkhmat u ban kren halor ka jingeh jong ki paidbah ki sah ha katei ka thain, ki la bynrap.