Shillong: Myn hynnin ka sngi, ki kynhun jong ki rangbah ka Raid Shabong ki la wan ban pynshai halor ka jing kynthoh u Sordar ka Raid Shabong u bah Biggestson Lyngdoh ha ka Dorbar Raid ka ba la long ha ka 15 tarik u Rymphang 2020 ha ka shnong Siatbakon.
Ha ba iakren bad ki lad pathai khubor, na ka liang u Chairman dorbar ka Raid Shabong u bah Ribanroilang Lyngdoh u la iathuh ba u Sordar u la kynthoh ia u ba u khlem kynjoh ktien ha shuwa ban ujor mukotduma ia ka KHADC ha ka ba ia dei bad ka ain thung sordar hapoh Saw Raid kat kum ka ain SawRaid Act 1997.
Na ka liang u bah Ribanroilang u la iathuh ba ka jingleit ai mukotduma jong u pyrshah ia ka KHADC sha ka ingbishar jong ka High Court jong ka jylla Meghalaya ka long ba u khlem ujor kum u chairman ka dorbar Raid hynrei u la ujor ia kane ka mukutduma kum u Genral Secretary jong ka kur Longtrai Lai Kynthei Raid Shabong.
U Chairman ka Raid Shabong u la ujor ruh ia ka jingleh donbor u Sordar ha u Paiem Balajied S Syiem ha ka 24 tarik u Nohprah 2019 ha ka ba u la kynnoh ba u Sordar ka Raid Shabong u la shu rai marwei ia ki kam ki jam jong ka Raid khlem da don kano kano ka jingtip ha ka Commitee jong ka Raid.
Na ka liang ki dkhot ka Commitee jong ka Raid ki la ujor ruh sha u Secretary ka Saw Raid,Syiemship Pomshutia bad sha u Secretary ka Executive Commitee i/c Elaka ka KHADC pyrshah ia u Sordar ka Raid Shabong u bah Biggestson Lyngdoh u la pynkhein ia ka rai jong ka Excutive Commitee bad ki riti dustur jong ka Raid Shabong ha ka ba u la shim rai hi marwei ia ki ba bun ki kam jong ka Raid.
Na ka liang u bah Phunstarwell Sumer u ba long u Asst.Secretary ka Raid Shabong, u la iathuh ba u Sordar ka Raid Shabong u la kynthoh ruh ia u ba u khlem pan jingbit na u SDO ka Pynursla Civil Sub Division ban pyrta shnong ha ka ba ia dei bad ka jingjied rang bah shnong ha Siatbakon.
Na ka liang u bah Phunstarwell u la kyntait ia kine ki jingkynnoh jong u Sordar jong ka Raid da ka ba ong ba ka long ka bym shisha bad ka ba lah ban ialam bakla ia ki nongshong dorbar,na mar ba ka comitee Raid ka la shong pyrkhat ha ka 12/11/2019 ha ing dorbar raid ha ka shnong siatbakon bad da kawei ka jingmut ki la rai ban pynlong ia ka jingjied ia u rangbah shnong ha ka shnong siatbakon ha ka 15/11/2019 bad la aiti ruh ha ka ophis ban pyndep ia ki kam baroh ha ka ba ia dei bad kane ka kam bad u Sordar hi u la pyniaid ia ka tei ka Commitee.
U bah Phunstarwell u la buh ruh ka jingkylli ba hato ia ka ei kaba la rai la dei aiti ia ka ophis ba kan leh dang hap pan bor nano nano sa shisien
Na ka liang kine ki rangbah ki la buh ruh ka jingkyrpad ia ki paidbah nongshong shnong hapoh ka Raid ba kin ym shah ban ialam bakla da ka jingkynthoh jong u Sordar namar ka dei ka bym don ka jingshisha.
Phi don ban ong eiei?