Wan pynphai biang ka Assam ia ki nar um, kaba ki la kurup na Ummat

Nongpoh: Hadien ar taiew, ba ki briew na Assam, ia kaba la kynnoh ba la lamkhmat da u Rupsing Teron, MLA ka Chingthong MAC Constituency, ha ryngkat ka jingdon ki nongialam na ki kynhun ka thain Karbi, ki la leit ban kurup bad shim jubor ia ki pipe um kiba don ha shnong Ummat, hynrei mynta ka sngi, ia kitei ki pipe um, la wan pynphai noh, da ki briew sorkar ka Assam.

Haba kitei ki briew na Assam, ki la wan pynphai ia kitei ki Pipe um, la donlang da u Raja Brahma, Border Magistrate ka Ri Bhoi, nangta ki heh Pulit na Ri Bhoi, kumjuh ruh da ka jingdon ki briew sorkar bad Pulit Assam.

Lah ruh ban kdew hangne, ba ha kine ki Taiew ba la dep, utei u MLA ha ryngkat kiwei, ki la wan ban kurup ia kitei ki Pipe um, halor ka jingkynnoh ba kitei ki pipe um Meghalaya, ki la don hapoh u pud u sam Assam. Hynrei ka jingwan pynphai jong ki hynne ka sngi, lehse ka dei namar ba la don ka jingiakren kaba sngewthuh jingmut hapdeng ki heh ka sorkar Meghalaya bad Assam.