Wan pyndem u snar ka GNLA

Shillong, 7 Risaw:
U nongialam ka GNLA uba bat ia ka kyrdan kaba ar hadien u heh duh jong katei ka seng Sohan D Shira, mynta ka sngi u la wan pyndem ialade ha ki pulit. Utei uba la wan pyndem u dei u Dy.Commander in Chief, u Zen Robert Ch. Marak uba ju khot sin u Rupanto Marak.
U Rupanto u la wan pyndem ryngkat uwei pat u para dkhot jong u, uba la tip kyrteng kum u Armindo B. Marak ba ju khot sin u Rangdat. Kitei 2 ngut ki la wan pyndem ha u Superitendent of Police ka East Garo Hills u Davies Marak. “Ka dei ka jingkynduh jingeh kaba khraw bha ia u Sohan D Shira,ngi ngeit ba kin dang don bun shuh ki ban dang wan pyndem” ong u Marak. Kitei kiba la wan pyndem ki la aiti ruh ia kawei ka pistol 9mm bad ki mobile phones.
“U Rupanto u la iathuh ia ngi ba u la rai ban pyndem noh ialade namar ka jingleh donbor palat u Sohan D Shira uba shu hukum beit tang kaei kaba u sngewmon bad namar ka jingpyniap briew kaba ym dei satia ban pyniap” ong utei u heh pulit. U la ong ba kitei ki dkhot ka GNLA ki shu lynga ialade bad ka lynti kaba khadduh ia ki dei tang ban pyndem noh ialade.