Wan pyndem u nonglum pisa ka ANVC

Nongstoin, 10 Jymmang:
Da ka jingiai bteng jong ki pulit ka West Khasi Hills ban pynlong ia ka jingkhynra lehnoh na ka por sha kapor ha ki thain Shallang, bad ha kiwei kiwei ki bynta jong ka West Khasi Hills kiba don markhap bad ki shnong Garo, kala pynlong ruh ia kiba bun ki dkhot bad ki snar jong ki kynhun kaikhlaw bapher bapher na Rilum Garo ban wan pyndem noh ia lade ha kmat ki pulit bad don ruh kiba la shah kem bad shah siat ruh kumjuh ha ka jingiather kuli.
Kum ban shu pynkynmaw ba ha ki sngi bad ki bnai bala leit kiba bun ki dkhot bad ki snar jong ka kynhun kaikhlaw bapher bapher na Rilum Garo kila wan ban pyndem noh ialade ha khmat ka ain ha ryngkat ki tiar ialeh bad don ruh kiba la shah kem noh ha ka jingkhynra jong ki pulit ka West Khasi Hills ha kiba bun ki bynta jong ka shnong Shallang, ha ryngkat ka jingioh ban kurup ruh ia shibun ki tiar ialeh.
U SP ka West Khasi Hills District u bah S. Nongtnger mynta ka sngi u la pyntip ruh sha ki lad pathai khubor ba u wei u dkhot jong ka kynhun kaikhlaw ka ANVC u ba la tip kyrteng kum u Allom G  Marak u ba na ka shnong Sinengkhri WKH, u la wan ban pyndem noh ia lade ha khmat ka ophis treikam ka jong u ha Nongstoin.
Shuh shuh u bah Nongtnger u la iathuh ruh ba u tei u dkhot ka ANVC u dei ba ju lum bad khrong pisa na ki khyrdop jong ki heh saipan bad u la long ruh kum u nonglum pisa ia katei ka kynhun ha katei ka thain  naduh u snem 2014, ym tang kata u la iathuh ruh ba ka daw jong ka jingwan pyndem noh u tei u dkhot ka ANVC ka dei namar ka jingjur jong ka jingkhynra lehnoh ki pulit ka Shallang.