Wan pyndem u nongialam ka GNLA

Tura, 9 Lber:
U nongialam jong ka Garo National Liberation Army (GNLA) uba bat ia ka kam Foreign Secretary u la wan pyndem noh ialade mynta ka sngi hakhmat ki pulit. Utei u nongialam ka GNLA u dei uba la tip kyrteng kum u Briyan R Marak bad uba ju khot sin kum u Millam (40 snem karta) na Tura Ringregittim, West Garo Hills, u la wna pyndem hakhmat ki pulit South Garo Hills ha ka por 10 baje mynstep ha ryngkat ka jingdonlang u DC ka SGH u Shella N Marak, SP Abraham T Sangma, ki nongialam niam bad ki sengbhalang. Utei u GNLA u la rung ha katei ka seng ha ka 30 tarik u lber, 2011.
U la iathuh ba hadien ar taiew ba u la rung sha katei ka seng la phah ia u sha Bangladesh bad ka por kaba bun u la pynlut ha Bangladesh. Ka kam jong u ha katei ka seng ka dei ban ia kren bad kiwei pat ki seng lehnoh ban pynioh ia ki tiar siat bad kiwei pat ki jingdonkam. U la shah kem ha ki pulit Bangladesh ha ka 15 tarik u nohprah, 2012 namar ka jingryngkang pud bad u la shong phatok kumba 10 bnai.