Shillong:Ka kynhun ki rang ialehkai ka Maldives, ki la wan poi mynta ka sngi U Blei hangne ha nongbah Shillong, kaba long kum shi bynta ka jingwan ba kin iakhun ka jong ki pyrshah ia ka India, ha ka jingialehkai paralok (international friendly) kaba la buh ba kan long ha J.N Stadium, Polo, ha ka 19 tarik mynta u bnai Lber 2025.
Kane ka kynhun ka la wan poi hynnin mynsngi ha kad liengsuin ha Umroi (airport) ia kaba la leit ban pdiang sngewbha ia ki da bah Cliff R Nongrum bad bah Freddy Kharpran Sun, kiba long vice president bad dkhot ka Meghalaya Football Association.
Katba hynnin ka miet jong ka sngi Saitjain, ka kynhun ki rang ialehkai phutbol jong ka India ki la long kiba la pynkhreh ba kin mih madan ban ia aireng pyrshah ia ka kynhun ialehkai ka Maldives, ha ka jingia lehkai paralok kaba la buh ban long ha ka 19 tarik mynta u bnai Lber bad ba kan sa bynrap lang pat bad ka jingiakhun pyrshah ia ka Bangladesh na ka bynta ka Assian Cup Qualifier 2025, ka ban long ha ka 25 tarik mynta hi pat u bnai.
Kine baroh artylli ki jingialehkai, kin long ha JN Stadium, Polo, Shillong.Kumba ka long na ka liang ki rang ialehkai ka India ryngkat bad u khlur ialehkai ba la wanphai biang na ka jingshong thait u Sunil Chhetri, hynnin ka janmiet jong ka sngi Saitjain.
Ki ka hiar ban iuj kjat ha madan ialehkai jong ka JN Stadium, Polo, ha kaba ki la ioh ia ka lad ban ia kilan lang khrui kum ka kynhun hadpeng ka jingeit pyrman bha ka jong u coach ba rangbah ka ri.
Ha shwa ba ka kynhun ki rang ialehkai jong ka India kin ia kilan, na ka liang ka Meghalaya Football Association (MFA) hapoh ka jingialam u bah hamletson Dohling, bah Sunesh M Syiem kum president bad secretary lem bad ki dkhot nongkitkam, ki la pdiang burom ia kane ka kynhun, kaba long artad kum ka dak ka jingai mynsiem bad jingkyrshan ia baroh ki rang ialehkai.
Kine ki artylli ki jingiakhun jong ki international match, kiba dei artad ka sien kaba nyngkong ba kum ka jylla kan ioh ba kan pynlong, ka la ktik bha ruh ia ka mynsiem ki paidbah ieit phutbol, ban ioh ban sakhi da la ki jong ki khmat ia ki rang ialehkai ba kynsai jong ka ri ban iakhun ha kine ki artylli ki jingiakhun.
Phi don ban ong eiei?