Wan poi ki nonghikai MSSASA sha ka ja ka iakhih ki nonghikai AMSSASTA

Shillong 10 Risaw: Ka kynhun jong ki nonghikai skul SSA kiba hap hapoh ka shatri jong ka Meghalaya SSA School Association mynta ka sngi, ka 10 tarik Risaw 2024,ki la leit ban iakynduh ia ki nonghikai SSA kiba hap hapoh ka shatri jong ka All Meghalaya SSA School Teachers Association kiba la pynlong ia ka jingiakhih da kaba shong kyllain myngngor kaba khlem buh bor ha madan Malki, na ka bynta ban dawa na ka sorkar jylla, ha ka ba iadei bad ki hok jong ki kum ki nonghikai.

Na ka liang U President jong ka seng ki nonghikai skul MSSASA u Bah Aristotle Rymbai ha ryngkat bad kiwei pat ki nongialam ba hakhmat ki la wan ban pynpaw ka jingkyrshan ia ka seng ki nonghikai skul All Meghalaya SSA School Teachers Association halor ki jingdawa na ka sorkar jylla ban kyntiew ia ka tulop da 100 % bad ruh ban pynkynriah ia ki 13 hajar ngut ki nonghikai SSA na ka State Implementation Society sha ka tnad Education ka ban pynskhem ia ka kam hikai jong ki.

Ha ka jingiakren bad ki lad pathai khubor mynta ka sngi u Bah Aristotle ula ong, ba kane ka sienjam ban iatreilang ka long na ka bynta ka jingmyntoi jong baroh ki nonghikai skul SSA hapoh ka jylla.

Ula pyntip ruh, ba ka seng kan sa khot da ka General Executive Committee na ka bynta ban pan jingmut bad hangne yn iathir iatai wat la ka seng jong ka All Meghalaya SSA School Teachers Association kan dang bteng ia ka jingiakhih ruh.

Kum ban shu pynkynmaw hangne, ba ka seng ki nonghikai skul SSA hapoh ka shatri jong ka All Meghalaya SSA School Teachers Association ki la pynlong da ka jingiakhih shong kyllain myngngor kaba khlem buh por kaba la kynjoh mynta sha ka 10 sngi na ka bynta ban dawa na ka sorkar halor ka hok kaba ki dei ban ioh.