Jowai, 14 Naitung: Haduh 149 ngut ki nong Bangladesh ki la wan poi mynta ka sngi ha Shillong ban iashim bynta ha ka Nadi (Rivers) Festival ka ban sdang naduh la shai ka sngi Thohdieng.
Kitei ki 149 ngut ki kynthup ia ki nongialam ki seng treimon sngewbha, ki nongthoh khubor bad ruh ar ngut ki myntri ka sorkar Bangladesh.
Ia kitei ki heh sorkar ka Bangladesh la pdiang burom da ka bor District ka WJH bad ruh da ki shipai BSF.
Kitei ki ar ngut ki myntri ka sorkar Bangladesh ki kynthup ia u Myntri khynnah ba dei peit ia ka Civil Aviation bad Tourism, u Rashed Khan Menon, u Myntri khynnah ba dei peit ia ka tnad Foreign Affairs, u Syed Shariar Alam namar u High Commissioner Bangladesh bad kiwei kiwei.
Shwa kitei ki heh sorkar Bangladesh, la pdiang burom ruh ia u High Commissioner ka India ba don hapoh Bangladesh, u Harsh Vardhan Shringla bad ia ka Joint Secretary ka Bang Myanmar Desk, ka Shripriya Ranganathan.
Haba pdiang burom ia kitei ki heh na Bangladesh bad ia baroh kiba la wan poi sha Shillong lyngba ka Tamabil Dawki, la donlang u Deputy Commissioner ka WJH, u Arum Kumar Kembhavi, ka SDO Amlarem, BDO Amlarem, ki heh ki BSF na Shillong bad Khliehriat nalor ka kynhun ka put ka tem jong ki BSF kiba la tip kum ki Jazz Bandh ruh ki la wan ban pdiang burom ia kitei ki heh sorkar na Bangladesh.
Haba iakren bad u myntri khynnah ka sorkar Bangladesh, u Rashed Khan Menon u la ong ba ka Nadi Festival kan pyniajan shuh shuh ia ka jingiadei hapdeng ka thain Shatei Lam Mihngi ka India khamtam ka Meghalaya bad ki nong Bangladesh.
U la ong ba u don ka jingangnud ban kyntiew ia ka kam jngohkai ha Bangladesh bad u la kyntu ia ki briew na Meghalaya ban wan sha Bangladesh namar ki don bun ki jaka jngohkai kiba itynnad.
U la ong ruh ba lyngba kane ka Rivers Festival, u khmih lynti ba ki briew jong kine ki ar tylli ki ri ba marjan kin ia khaii khaba khnang ban kiew ka ioh ka kot khamtam ia kito kiba shong basah ha ki thain khappud.
Ha ka por janmeit, ia kitei ki heh sorkar Bangladesh la ialam sha ka School ha Dawki bakur ba kaba ki la ioh ban sakhi ia ki katto katne ki shad Tynrai kum ka shad Rongkhushi, shad Rongkhli bad kiwei kiwei kiba la ia shim bynta da ki samla na ka shnong Sohkha bad Nongtalang.
Kane ka Festival kan neh ar sngi bad kadei kaba la pynkreh da ka Asian Confluence, India, East Asia Centre, Shillong daka jingiatreilang bad ka sorkar Meghalaya ha ryngkat ka Maulana Abul Institute of Asian Studies.
Phi don ban ong eiei?