Wan phai ki heh BSF na Bangladesh

Shillong, 20 Naiwieng:
Ka kynhun ki heh shipai khappud ka India , BSF hapoh ka jingialam u PK Dubey IG, Meghalaya Frontier ka la wan phai ha ka 18 tarik u naiwieng na ka jingialang kaba saw sngi kaba la long naduh ka 15 haduh 18 tarik mynta u bnai ha Sylhet, Bangladesh. Ha katei ka jingialang la donlang u Inspector General of Meghalaya, Mizoram & Cachar bad Tripura Frontiers -BSF, DIsG jong baroh ki sector.
U heh shipai BSF u la pynpaw ia ki mat jong ki shipai BSF ha ki heh shipai ka Border Guard Bangladesh. Ki mat ba kham kongsan ba la ia kren ha katei ka jingialang ki long ka jingdon ki seng lehnoh na india kum ka GNLA, HNLC, ULFA, NDFB, NLFT hapoh u pud u sam ka Bangladesh, bad la pynshisha ruh ha ki shipai Bangladesh da ka jingring dur.
La ia kren halor ki kam pyntriem kum ka jingryngkang pud kynthup ka jingkhaii masi tuh sha Bangladesh, ka jingkhaii FICN bad kiwei pat ki kam pyntriem. La ia kren ruh ia ka mat ker sainar shiah napoh ka 150 yard na khappud.
Ki heh shipai Bangladesh ruh ki la pynpaw ia ka jingshah siat pathar ki nong Bangla ha ki nong India bad ka jingiaid tuh ki drok, kyiad, Phyndedyl sha katei ka ri. Ki shipai BSF ki la kyntait ia ka jingkynnoh ki shipai Bangladesh ba la siat pathar ia ki nong Bangladesh bad ki la ong ba ka lah ban dei ka jingleh ki shnong ban iada ialade. Ki la ia mynjur ban ia pynbeit iwei ia iwei halor kitei ki jingeh baroh.