Wan phai biang U Mukul & Bah Lapang na kad liengsuin

Shillong, 24 K’lyngkot:
U Myntri Rangbah ka jylla u Dr Mukul Sangma lem bad u president ka MPCC Bah DD Lapang ha kane ka sngi Thohdieng ki la wan phai noh na kadliengsuin na Guwahati sha Shillong haddien ba ka jingialang jong ka party ha Delhi la pynsangeh noh.
Ka thymmei khubor ka iathuh ba baroh ar ngut u Dr Sangma bad u Bah Lapang ki la mareh wut wut sha Guwahati namar ba la bthah ba kin leit sha jingialang jong ka party ha Delhi.
“Ynda poi ha ka dliengsuin ha Guwahati, la pyntip ia ki ba ka jingialang la pynsangeh shwa. Hangta kine baroh ar ngut ki la wan phai biang noh sha Shillong ban rakhe sngi Republic Day ban long ha ka sngi u Blei” la ong ka thymmei khubor ba la iohlum.
Shwa ia kane, ka State Election Committee (SEC) ka MPCC ka la pynbna ia ki kyrtong jong ka party na ka bynta ka KHADC bad ka la pyn sangeh shwa ia ka JHADC namar ba kine ki mut ban leit sha Delhi.
Ka jingpynbna ia ki kyrtong ka JHADC yn sa leh pat la sngi Nyngkong.