Shillong, 17 Naiwieng:
Hadien hynniew snem jong ka jingkhie ka ribaibal, kaba jur ha Ri Khasi Jaintia, hynrei ha ki khyndiat sngi ba ladep, la iathuh ba ka ribaibal, ka la wan biang ha ka balang Badshahitila, kaba hap ha Karimganj District jong ka Jylla Assam bad kaba don ki dkhot balang, kumba 500ngut eiei.
U Bah Skilful Pohsnem, uwei na kiba leit ban pynlong jingiaseng ialap, ha ryngkat bad ka kynhun jongu, ula iathuh ba ki la sakhi ia katei ha ka jingleit ialap jongki ha katei ka Balang, ha ka 19 bad 20tarik Risaw 2013.
Ha katei ka balang, kiba shong ba sah, ki dei ki Pnar suda bad U bah Pohsnem, haba iathuh ha U Rupang, ula ong ba ki lyngba ka bor jong katei ka jingiaseng ialap, kaba ki la sdang nyngkong naduh u bnai Jymmang 2013, ki la don bun ki bym ju leit jingiaseng, ki la leit jingiaseng thikna bad nangta kiba dih buaid tanglang,ki la sangeh na ka jingdih bhor bad mynta ki la leit jingiaseng bad u iathuh ba ki don da ki spah ngut, kiba la sdang biang ban leit jingiaseng ha kine ki sngi.
Ha ka jingtrei jong ka ribaibal, ula iathuh ba katei ka la ktah ia palat 20ngut shaneng, ha kaba ki don ki khynnah, ki samla bad ki rangbah ruh, kiba la mad ia katei ka jingkhih jong u mynsiem ha ki. “Mynshwa, ki ioh ribaibal, ha u snem 2006” iathuh U bah Pohsnem, halor ka jingsdang khie im ka ribaibal, ha kine ki sngi, ha katei ka shnong, kaba hap ha ka Pnar Thor Sepngi Presbytery, ha ka jingpeit jong ka KJP Synod Mihngi.
Kham mynshwa, ha u bnai Jymmang 2013, katei ka kynhun ialap, ka la leit sha katei ka shnong Badshahitila bad hangtei, ka la don ka jingkhih mynsiem, kaba khraw, ha ki dkhot jong ka balang ha katei ka jaka. “Nga sngewkmen ban don ha kito ki jingiaseng namar ba ki jingrwaiki long kiba thiang haduh katta katta nga sngew kumba nga don habneng” ong ka kyrwoh na utei u rangbah.
Phi don ban ong eiei?