Wan pdiang ka kong Roshan ia ki tiar ki lehnoh khlem kren shi kyntien

Shillong, 4 Jymmang:
Ka myntri kam pohing ka jylla ka la wan mih tang kumba 10 minit eiei ha ka jingialang kaba la long mynta ka sngi ha ka Conference Room kaba don ha ophis u DGP ka jylla. Katei ka jingialang ka la long ban pdiang ia ki lehnoh GNLA bad ULFA kiba la wan ban pyndem wait haduh 16 ngut.
Ha katei ka jing ialang la kren shi kyntien ar kyntien tang da u DGP ka jylla u Rajiv Mehta ha ryngkat ka jingiadonlang ka kong Roshan bad kiwei pat ki ophisar bad hadien kata la khot ia ki lehnoh ba kin wan ban aiti ia ki tiar ialeh jong ki ha kaba ki la pyndem ia ki tiar ialeh jong ki da kaba aiti ha kti ka myntri kam pohing bad ha u DGP ka jylla bad tang mar ia dep pdiang ia kitei ki tiar ialeh ka kong Roshan ka la mih noh na katei ka jaka khlem kren eiei tang shi kyntien ruh. Hadien katei ka jingialang ka la kut bad la ailad ia ki nongthohkhubor ba kin ia kren bad kitei ki lehnoh ba la wan pyndem.