Wan nyngkong u samla bym ju pyndonkam mobile phone

Shillong, 08 Jymmang:
Lehse ha kane ka juk, wat ki khynnah kiba dang pule klas IV ruh bun kiba la bat mobile hynrei khampher ban ioh sngew ba u samla Lawanaibok Kharphuli uba la wan ba nyngkong duh ha ka eksamin HSSLC 2017 ha ka sobjek Saian, um ju don mobile satia.
U samla Lawanaibok uba pule ha St Anthony Higher Secondary School, Shillong u dei uwei na ki khynnah Khasi, ban ioh ia kane ka kyrdan hadien bun snem ba ki Khasi kim ju kot bor ban bat ia ka kyrdan ba nyngkong ha kane ka lain jingpule. U dei u khun phrangsngi jong i Kong Pelperu Kharphuli iba trei ha PHE Shillong bad u Bah K Basaiawmoit kiba sah ha Nongkseh, ha tnad Agriculture, Shillong.
U la ioh distinction ha ki sobjek ha ka English, Maths, Physics, Khasi, Chemistry, Biology, da kaba kamai 468 mark na ka 600 mark.
Ha ka jingiakynduh bad u nongthoh khubor mynta ka sngi, u Samla Lawanaibok, u la ong ba ka jingjop jong u ha kane ka jingiakhun ka dei namar ka jingtrei shitom jongu. Bad kaba kham phylla ban ioh sngew na u, ka long ba um ju don mobile phun bad haba u donkam ban iakren bad ki paralok u pan da ka phun jong ki kmie ki kpa.
“Ha nga shimet, ngam ju kwah bat mobile, ngam kwah ban pyndonkam mobile phun”, ka dei ka jubab jong u samla Lawanaibok bad bynrap, lada don ki paralok ba pan number, u ai jong i mei ne i pa jongu.
Katkum ka jingiathuh jongu, um ju kwah ruh ban ia lehkai ha ki social media kum ki facebook, ki whatapps bad kiwei ki kam kai ban pynlut ia ka por hynrei u dem beit khop ha ka jingpule kumba ar kynta man ka sngi. Ym dei ba u shu pule kot beit baroh shi sngi hynrei u dei ruh u samla uba ieid ban ialehkai kum ka phutbol bad kriket. “Nga ju sngew tynnad ban ialehkai phutbol, kriket”.
U la ai ia ka jingsngewnguh ia u Blei, ia ki nonghikai kiba la iarap ia u bad khamtam ia ki kmie ki kpa. Nangne shakhmat, u la pynpaw ba u kwah ban leit pule doktor (MMBS) ban saindur ia ka lawei jongu kaban wan. Ha kajuh ka por, ki kmie kpa jongu, kiba la iakren, ki la pynpaw ba ha ka jingshisha, kim ju khang ia u ban bat ne pyndonkam mobile, ki la phah ia u ban bat mobile ban kham suk ka leit ka wan haba donkam hynrei um kwah ban leh kumta.
“Ngi la ong ia u ban rah mobile namar ban kham suk ban iakren haba donkam kumno kumno ha skul hynrei um ju treh”, la ong u Bah Basaiawmoit u kpa jong une u samla.
Ha kajuh ka por, u Rev. Fr. Surjit Tigga SDB, u la pynpaw ia ka jingkmen ba ka skul ka la paw khmat biang ha kane ka result mynta u snem khamtam eh ha ka Science. Haba kren hynne ka sngi, u Fr Tigga u la ong ba ka jingioh ia u soh ka dei namar ka jingtrei shitom ki nonghikai kiba la don ka jingshemphang, ka jingkitkhia ki kmie ki kpa ia ki khun. “Ka jingioh ia ka result kaba bha ka long kaba kmen ia ka skul, bad kumjuh ia ki khynnah bad ia ki kmie ki kpa”, u la ong.
Ha ka jingpynbna result jong ka kas XII (Science), napdeng ki 10 ngut, kiba wan shakhmat duh, 9 ngut ki dei na St Anthnoy Higher Secondary School, katba iwei la ioh na Laban Bengali Boys Higher Secondary School. Ha ka Commerce Stream pat la wan nyngkong ka Kavita Joshi na Seven Set Annexe High Secondary School. Baroh kiba ialeh ia ka HSSLC Science ki don 3662 ngut kynthup 1364 ngut ki kynthei, bad 1447 ngut ki shynrang. Ha ka Commerce Stream, ki don 1576 ngut kynthup 929 ngut ki shynrang bad 647 ngut ki kynthei. Ha ka Science stream ka percentage ka long 76.76 percent katba ha ka Commerce ka long 71.87 percent.