Nongstoiñ: Ki heh ophisar ka Jylla Assam myn ha ka sngi Thohdieng jong ka taïew ka 25 tarik u Jylliew, ki la wan kiew sha ka thaiñ Langpih bad pynlong ruh ia ka jingialang ha Langpih.
Ki tyllong khubor bala ioh lum ki iathuh ruh ba kitei ki heh ophisar ka Assam kiba kynthup ia u ranger ophisar u DFO ki engineer bad kiwei kiwei kila thmu ban leit sha ka shnong Mawsikar bad ka shnong Kyrdum na ka bynta ban jurip ia ki jaka puta.
Ym tang kata ki tyllong khubor ki iathuh ruh, ba ka jngwan jong kitei ki heh ophisar ka Assam sha ka thaiñ Langpih ka long ba ki thmu ban buh ia ka ktem na ka bynta ka tnad Forest bad na ka bynta ban wad ia ka tyllong um bam.
La ong ruh ba ki riew rangbah jong katei ka thaiñ ki la ïoh jingtip lypa bad ki la pynlong ruh ia ka jingap pahara da ki paidbah hapoh shnong bad kitei ki heh ophisar ka Assam, hadien ba ki la ïohi ïa ki paidbah kim shym la leh ei ei shuh, hynrei ki la shu jurip noh malu mala bad ki la leit noh shi syndon bad ki la pynlong ruh ïa ka jingïalang ha ka shnong Langpih.
Kawei pat ka tyllong khubor ka ïathuh ba ki nongshong shnong jong katei ka thaiñ ïa mynta kidon hapdeng ka jingshong syier namar ka jinglong jingman ha katei ka thaiñ khamtam ba ki don ki katto katne ngut ki nongkitkam jong ka Raidmynsaw kiba la ïajuh ïajan bha bad ki nong Assam kat haduh ba ki la ïa shonglang ruh wat ha ka jingïalang jong katei ka kynhun na Assam ha katei ka sngi.
Ki paidbah kane ka thain ki lah dei ban leh noh kum ki nong Manipur, Arunachal Pradesh. Ynnai ap sorkar , MLA, MDC ne ki Sengbhalang ioh shu duh ei ia ki jaka la jong, leh sorkar hi, Sengbhalang hi, MLA & MDC hi, ba phin sngewthuh ia ka jinglong trai ia ka jaka la jong. Kiwei kim dei trai kin shu kut tang ha ka jingiakren, bad ia kynthoh ha briew ha social media.