Wan ki heh ki hain, shah thngan mangi ki rit ki ria, ong ki nongdie sha

Shillong:Kum shi bynta ban pynkhreh ia ka jingwan ka President jong ka Ri India ka Murmu, ha ka 16 tarik u kyllalyngkot 2024, la iohi ba naduh hynnin ka sngi, na ka liang ka sorkar jylla ka la ker da ki jain bad pynieng da ki siej hakhmat ki dukan die ja bad sha ha surok Civil Hospital Shillong.

Kane ka jingker jain bad pynieng siej ka sorkar jylla, ka long ban pynitynnad ia ka surok, namar ka jingwan hiar ka President jong ka Ri.
Ha ka jingiakren bad ki lad pathai khubor, ki nongshong die ja bad sha ha khmat jong ka Civil Hospital Shillong ki la ong, ba kane ka jingker jong ka sorkar ia ki dukan ka la ktah shisha ia ka kamai jongki, namar ba ka la ker kut lut ia ki dukan baroh.
Ki la iathuh ruh ba lashai ka sngi ka 16 tarik ka sngi ba wan ka President, ki hap ban khang ia ki dukan tad haduh ban da leit phai noh ka President na ka jylla.

“Ka jingker jong ka sorkar kumne, ka long shisha kaba itynnad, hynrei ka kamai jong ngi pat ka long kaba la hiar palat, namar ia ki kali bad ki ar shaka kiba iengslem hajan kine ki dukan ba die soh bad die ja ym shah shuh”, la ong ki nongdie jingdie.

Ki la ong ruh, ba ka jingwan jong ki heh ki hain hapoh ka jylla, ka pynshah thngan iangi ki duk ki suk.