Nongstoiñ: Hadien ba u nongthoh khubor u la pynmih ia ka jingthoh halor ka jingpyrshah jong ka synjuk ki nongdie doh syiar bad nongri syiar ka thaiñ Nongstoiñ kiba la rai ruh ban khang pyrshah ban shalan ia ki syiar nabar hapoh ka thaiñ; ha ka sngi kaba bud kata ha ka 6 tarik mynta u bnai la wan poi syndon da ka kynhun jong ki bar jylla hapoh sor Nongstoiñ.
Ka kynhun ki bar jylla kiba la wan na Kolkata da ka jingthmu ban wan seng kam ri & khaii syiar ha Nongstoiñ
Katkum ka tyllong khubor ba la ioh lum da u nongthoh khubor, la ong ba katei ka kynhun jong ki bar jylla kaba don haduh kumba 18 ngut ei ei kynthup lang bad kawei ka kynthei, ki dei kiba la wan naduh ka Nongbah Kolkata da ka jingthmu ban wan sdang syndon ban seng kam seng jam lyngba ka kam ri syiar bad khaii syiar hapoh ka thaiñ Nongstoiñ.
U nongthoh khubor u la ioh lad ruh ban iakren bad ki katto katne ngut ki samla kiba la lap ia kitei ki bar jylla, ha kaba katkum ka jingkylli bad tohkit bniah jong kitei ki samla shnong la ong ba katei ka kynhun ki bar jylla, kim shymla don satia ia ki kot ki sla kiba biang.
Shuh shuh, katkum ka jingiathuh jong kitei ki samla kiba la lap, la sngewthuh ruh ba jingwan poi jong kitei ki bar jylla ha Nongstoiñ, kam shym la dei satia kaba shu jia ryngkhat, hynrei la suba jur ba ia kitei ki bar jylla la don mano re mano kiba la wan ban ialam bad pynpoi sha Nongstoiñ na ka bynta ka jingmyntoi shimet jongno re jongno.
Ha katei kapor ki dkhot jong ka HYC Nongstoiñ Circle kiba la iohi ia katei ka jingjia, ki la bat noh ia kitei ki bar jylla, namar kim shymla don satia ia ki kot ki sla kiba biang bad hadien ki la leit ban aiti noh pat ia kitei ki bar jylla sha ki bor jong ka ain ba kin leh ia kaba donkam baroh.
Na ka liang ka HYC ka maham tyngeh ia kino kino ki paidbah nongshong shnong jong ka thaiñ Nongstoiñ, ba kim bit ban wan ialam ia kum kitei ki briew kiba thmu pat ban wan knieh noh ia ka kamai ka kajih jong ki paradoh ki parasnam bad lada ka seng ka lap ia kiba ialehpyrshah kan hap ban shimkhia bad ban leh ruh da ka tyngeh.