Wan kam ka mahajon Khasi kaba na khlieh iew, ia U Ali, ba u dei u nongtrei jongka

Shillong: Wat la u Syiem ka Hima Mylliem u la pynmih ia ka hukum ban nym ot kilo be-ain shuh ia ki mar jong ki nongrep ha Iewduh bad khamtam hadien ba la mynjur ruh da ka Khasi Hill Autonomous District Council (KHADC), hynrei ka jingot kilo ka dang bteng haduh mynta ka sngi.

Myn hynnin ka sngi na ka liang jong ki nongrep hapoh ka shatri jong ka Hill Farmers Union (HFU) ki la ioh kem ia uwei u briew uba kyrteng u MD Raful Ali uba dei na Rongia, Assam uba la ot kilo be-ain ia u piskot. Hadien ba la ioh kem ia une u briew na liang jong ki dkhot ka seng HFU ki la leit ban ujor sha u OC jong ka thanat Mylliem, hynrei na ka liang jong u OC ka thanat Mylliem u la ong ba um lah ban shim ia ka jingujor namar kam hap shuh hapoh ka jingpeit jong ka Hima Mylliem, namar la ioh kem ia une u briew na ka jaka ieng kali ha Khlieh Iewduh.
Hadien kane na ka liang jong ka seng ka la leit ban ujor noh sha u OC jong ka cantonment Beat House Anjalee. Hadien kane na ka liang jong ki pulit ki la pynlong ia ka jingtohkit kaba la neh kumba 4 kynta tam. Hadien ba la dep tohkit la lap ba une u bar jylla um don satia ia ka license khaii lane trading license. Hynrei kaba sngew phylla hadien katto katne por kawei ka longkmie khasi kaba don kudam ha khlieh Iew, ka la wan kam ia utei u nongkhaii uba dang shu wan shisngi ar sngi ba u dei u nongtrei jongka.
Na ka liang jong ka seng ki nongrep Hill Famers Union (HFU) ka la ai ia ka jingujor sha ki pulit halor kane ka jingbteng ot kilo be-ain ia ki mar rep wat hadien ba u Syiem ka Hima Mylliem u la pynmih ia ka hukum bad khamtam hadien ba la mynjur ruh da ka District council.
U bah Alfondbirth Kharsyntiew General Secretary jong ka HFU haba iakren bad u nongthoh khubor u la ong ba na ka liang jong ka seng kan nym shongthait, hynrei kan iakhun beit tad haduh ban da lah ban pynduh ia ka jingot kilo be-ain ia ki jhur kiba leit die ha Iewduh bad kiwei ki iew ha ka jylla. Ka seng ka la pan ruh ia ka jingiatreilang jong ki Rangbah Shnong bad ki briew kiba don ka mynsiem ban iarap ia ki nongrep kiba kiba shah ban banbein ha ka dur ka mur bad ka jingot kilo be-ain ia baroh ki mar rep.