Wan ka 22tarik, yn plie ki dukan khap shniuh, ki restaurant ha ka Jylla

Shilllong: Naduh ka 22 tarik la shah ban plie ia ki dukan khapshniuh, ki dukan pynbhabriew bad ki restaurant, hynrei ka sorkar kam pat shah, ban plie ia ki restaurant ki ba don ha ki surok bah

U Symbud myntri rangbah ka jylla u bah Prestone Tynsong, mynta ka sngi u la iathuh ba ka sorkar jylla naduh ka 22 tarik u jylliew 2020 la shah ban plie ia ki dukan khapshniuh (salons/barber shops), ki dukan pynbhabriew (beauty palour) bad ki restaurant kin plie noh ha baroh kawei ka jylla.

H ba iakren bad ki lad pathai khubor, u bah Prestone u la iathuh ba ki dukan khapshniuh, ki dukan pynbhabriew bad ki resturant la shah ba kin plie noh na duh ka sngi nyngkong ban wan, hynrei ki restaurant kiba don ha ki surok bah (national Highway) kin dang khang shuwa haduh da la pynmih jingpynbna pat da kumwei.

U bah Prestone u la iathuh ba kine ki dukan kiba ka sorkar jylla ka la shah ban plie ha kylleng ka jylla kin hap ban bud ryntih ia ka jingbthah jong ka tnad ka koit ka khiah.