Nongpoh, 15 lyngkot:
Ka Shnong Nongbah-Myrdon kaba dei kawei na ki shnong nongkyndong ha Ri Bhoi District ka la shah jied kum kata ka ‘Model Village’ hapoh ka ri, ia kaba la jied da u KTS Tulsi, MP ka Rajya Sabha. Hynnin ka sngi, U KTS Tulsi ha ryngkat bad 4 ngut ki para MP ka Rajya Sabha, ki la leit ban iuh kjat ia katei ka Shnong, khnang ban iohi ia ki jingshisha halor ka jinglong jingman ha katei ka shnong kaba la ioh ia kata ka nam kum ka ‘Model Village’.
Kitei ki MP na ka Rajya Sabha, kiba la wan naduh Nongbah Delhi ban leit iuh kjat ha ka Shnong Nongbah Myrdon, nalor u KTS Tulsi, kiwei pat ki kynthup ia u Dr. C.P Thakur, u Joy Abraham, Santiuse Kujur, bad u Ram Kumar Kashyap, kiba dei ruh ki dkhot ka Parliament hapoh ka Rajya Sabha.
Kumban shu kdew hangne, ka daw kaba pynlong ia katei ka shnong ba kan ioh ia kata ka nam kum ka ‘Model Village’ ka dei lyngba ka skhim Sansard Aadarsh Gram Yojna (SAGY), kaba dei kawei na ka skhim sorkar pdeng ia kaba la wan rah da u Myntri Rangbah ka ri u Narendra Modi, na ka bynta ban wanrah iaka roi ka par ha ki shnong nongkyndong.
Ha katei ka sngi, u KTS Tulsi, haba u la poi ha katei ka shnong, nyngkong ehh u la pynpaw ia ka jingsngewhun ban iohi ia ka jingpyntreihok da katei ka shnong ia ki skim kiba la ioh jingiarap na ka sorkar. Ha kajuh ka por u la ong ruh ba ka daw hi kaba pynlong ia u ba un jied ia katei ka shnong kum kawei na ki ‘Model Village’ ka dei namar ka jinglah ban pyntrei ha kata ka rukom kaba shai bad kaba biang
ia ki jingkhein jingdiah ia kiba bun ki skim sorkar.
Kaba kren halor ka jingsniew jong ka surok kaba pyniasoh sha Nongbah Myrdon, na ka liang utei u MP ka Rajya Sabha, u la iathuh ba u la dep ban iakren bad ka Ministry of Rural Development, ha kaba ka la kular ruh ban siang rong ia katei ka surok kaba leit sha Nongbah Myrdon village.
Ha katei ka sngi la sakhi ruh da ka jingdonlang u Bah P. Khonglah BDO ka Umsning C&RD Block, u Bah B.S Rumnong Deputy Director ka SIRD, lem bad ki riew rangbah ha katei ka shnong.
Phi don ban ong eiei?