Nongpoh:U Myntri ka Sorkar Pdeng, uba dei peit ia ka tnad Jal Shakri, U Gajendra Singh Shekhawat, ha ka sngi saitjain, u la leit ban iuh kjat ha Ribhoi na ka bynta ban ia kynduh ia ki Ophisar Sorkar ban wad jingtip halor ki kam pynroi bala pyntrei kam ha kane ka District kum kawei na ka ‘Aspira tional District’ kaba la nang kyrpang ia ki kam pynroi, ban kyntiew ia ka roi ka par jong kane ka District lyngba ki song pynroi na ka Sorkar Kmie.
Haba wan ban iuh kjat ha Ri Bhoi, u Gajendra Singh Shekhawat, u la leit ban jurip ia ka Aganwadi Center ha Umdihar, bad ban ia kynduh kyrpang ia ki khynnah, hadien kata ula pynlong ia ka jingiakynduh lang bad ki Ophisar Sorkar ha Conference Hall ka Ophis u Deputy Commissioner ka Ribhoi ban wad jingtip halor ka jingpyntreikam ia ki song pynroi lyngba ka sorkar kmie ha kane ka District ba la tip kum ka Aspirational District.
Ha katei ka jingiakynduh lang la shim bynta ruh da ki Ophisar Sorkar naki tnad treikam bapher bapher ka Ribhoi bad kynthup ruh ia ki Ophisar kiba synran ia U Myntri ka Sorkar Pdeng, ha kaba ia kane ka jingiakynduh lang la pyniaid da u Deputy Commissioner ka Ribhoi, U Arpit Upadhay, u ba la ai ka jingpynshai halor shibun ki kam pynroi kiba ki la leh lyngba kita ki song pynroi kum ka Aspirational District.
Lyngba jong kane ka sngi ula leit ruh ban shim bynta ha ka program ha District Library Auditorium Hall, ha kaba la Sam ia ka song Pisa na ka bynta ki Village community Felicitator lyngba ka Meghalaya community Led Landscape Project, kiba dei ki kam kiba ki trei ban iada ia ka mariang ban pyneh ia ki umbam umdih bad ia ki khlaw ki btap.
Na ka liang jong u Myntri ka Sorkar Pdeng, U Gajendra Singh Shekhawat ula pynpaw ruh ba u sngewkmen ban ioh ban ia kynduh ia ki Ophisar bad ki Nongshong Shnong ka Ribhoi, ha kaba kum ka Aspirational District ki la trei ryngkat ban kyntiew ia kane ka District ha ka roi ka par bad ula pynpaw ruh ba ka Sorkar BJP ha ka jingialam u Narenda Modi u la leh shibun ki kam pynroi ban kyntiew ia ka Ri India hi baroh kawei.
Phi don ban ong eiei?