Wan iuh kjat ka Mem na Amerika, ha Lawkyntang Mawphlang

Shillong,17 Nailur:
Ka Dorbar Ki Khlieh Nongsynshar ka Ri Hynniewtrep, ka Federation of Khasi States, ka Dorbar Ki Dolloi, Ki Sirdarship, ka Council of Nokmas, ki la pdiang sngewbha ia ka Ms Helen LaFave, US, Consul General, ha ryngkat ki ophisar ka US ha khmat Law Kyntang Mawphlang ha ka step jong ka 17 tarik u nailur 2014. Ha katei ka jingwan iuh kjat ka US Consul General, ha ka jingsynran lang u Bah. John F Kharshiing, Co-Chairman, Meghalaya State Planning Board, Chairman, The Grand Council of Chiefs of Meghalaya, Spokesperson, Federation of Khasi States, ka la rung shapoh katei ka Law Kyntang ban sngap ia ki jingbatai kiba bniah kiba la ai da u samla jong ka Hima Mawphlang.
La ia synrang lang shapoh katei ka Law Kyntang, ia katei ka long heh jong ka Sorkar United States of America, da u Khlieh jong ka Hima Mawphlang u Bah NK Lyngdoh, Lyngdoh Hima Mawphlang Lyngdohship, u Bah. Lamphrang Blah, Myntri & MDC, KHADC, u Bah HL Ryntathiang, Lyngdoh, Hima Lyngiong Lyngdohship, u Paiem Kestonbell Syiemlieh, Deputy Syiem, Hima Nongkhlaw (State)Syiemship, u Bah Stening Jone Mawnai, Myntri, Hima Nongkhlaw, u Bah Lawrence Basaiawmoit, Myntri, Hima Nongkhlaw Syiemship, u Dr B W Lyngdoh, bad kiwei kiwei ki bakhraw jong ki Hima Khasi, ha ka jingiadonlang u Bah John F Kharshiing, kiba la pdiang sngewbha ia katei ka US Consul General sha ka Law Kyntang jong ka Hima Mawphlang, bad la ai Sngewbha ia katei ka longheh na USA da ka dur jong ka law kyntang bad ka jingthoh shaphang katei ka khlaw Kyntang.
U Bah HL Ryntathiang, Lyngdoh Hima Lyngiong u la ai sngewbah ia katei ka longheh USA ia ka jingbatai khana lyngkot shaphang ka Law Kyntang jong ka Hima Lyngiong kaba lah ban iohi kyndiang na ka jaka ieng ba peit ia ka Law Kyntang jong ka Hima Mawphlang. La batai bniah ia katei ka US Consul General ia ka jinglong kyntang katei ka khlaw da u samla uba la thung kyrpang da ka Hima Mawphlang, uba la batai bniah ia ka khana kaba palat 700 snem jong ka Law Kyntang.
Ka US Consul General, Kolkata, ka la ong ba ka jylla Meghalaya ka long kaba donbok palat ban don kum kine ki spah mariang ia kaba kiwei ki jylla bad ki Ri kim don. Ka la ong ba kadei ka jingstad jong ki longshwa ba ka pateng kaba mynta ngi myntoi. La batai ruh khyndiat halor ka REDD program (Carbon Credit) ba la pyrshang da ki hima kiba marjan ia kaba la iarap da ka Community Forest International(CFI). Ka US Consul General ka la leit ruh ban jngoh ia ka Dam PHE ha Mawphlang kaba long kaba sam um bam umdih ia ka Sor Shillong baroh kawei.
Hadien kane ka Ms Helen LaFave, ka US Consul General, Kolkata, ka la leit ban iuh kjat sha Iing SAD ka Hima Khyrim ha Smit, ha kaba la pdiang sngewbha ia ka tei ka longheh da u Paiem Dr Balajied S Syiem, Syiem Hima Khyrim ha ryngkat ka jingdonlang u Lyngskor, ki Bakhraw ki Myntri, jong ka Dorbar u Syiem Khyrim, ha ryngkat u ‘Kongor’ ha Smit, kaba don kumba 17 Km ka jingjngai na Sor Shillong.