Wan ha khmat duh, ka khun u nongdie jhur ha ka HSLC jong ka Mizoram

Ka Lalringnungi, ka samla lud kaba 16 snem ka rta, ka la wan ha khmat duh, ha ka jingialeh eksamin jong ka  High School Leaving Certificate (HSLC) jong ka Mizoram.

Ka Lalringnungi, ka dei ka khun jong u nongdie jhur bad ka la kyndit thret ialade, haba ka poi ha katei ka kyrdan kaba ha jrong duh. Katei ka samla, ka pule ha  St Joseph Higher Secondary School bad ka ioh  97.2% ha kaba ka la pynliem ia ki 17hajar ngut kiwei pat ki kandidet.

Ka Lalringnungi, ka dei ka khun jong U  Zothanluanga bad ka Lalhlimpuii bad ka kam jongka, kaba man ka sngi, ka long ban leit iarap die jhur ha iew, hynrei hynnin ka sngi, ka la dei ka jingjia kaba pher, ha kaba ki nongthied jhur bad ki nongleit nongwan, ki leit leit ban ia pajut kti bad ka.

Ka Lalrinnungi, ka shait die jhur man ka sngi Saitjain bad ki kmie ki kpa jongka.