Wan buh kot 666, ha ing mane Presbyterian Baniun

Shillong, 7 Iaiong:
Ka la don ka jingjia kaba pynkyndit ia ki riew ngeit jong ka balang Presbyterian ha ka balang Baniun, Upper Shillong ha ka jingiaseng kaba la long ha ka sngi u Blei kaba dei ruh ka sngi ba ki paid riew ngeit kristan, ki pynlong jingiaseng kyr pang ban rakhe ia ka sngi mih pat u Jisu na ka jingiap.
Kat kum ki khubor kiba la ioh lum la iathuh ba ha ka jingiaseng ba-ar (jingiaseng kaba sdang por 1 baje nohsngi), shuwa ban wai artad ka jingiaseng bad dei ruh ha ka por duwai pynwai, ha ka por ba baroh ki paid riewngeit ki dang khap brip ka khmat, la don ba wan buh ia kawei ka song ba la song da ka kot, ha ka jaka shong ba shadien duh jong ka ing mane bad kaba dei ruh ha ka por ba ka don ka jingther jur bha u slap ha katei ka jaka. La iathuh ba ki rangbah kim shym la iohi ia katei ka jingjia, namar ba ka dang dei ka por duwai, hynrei ki don ki khynnah kiba shong kham shadien, kiba la iohi ia ki briew ba wan buh ia katei ka kot bad phet krad noh na katei ka jaka bad don ki khynnah kiba ong ba ki briew ba wan buh ia katei ka kot ki don haduh saw ngut, kiba shu wan buh tok, katba dang iaid ka jingduwai bad ki leit noh, don pat ki khynnah kiba ong ba la wan tang marwei u riew rangbah, u la buh ia katei ka song bad u la leit noh.
La ong ba hadien ba la wai ka jingiaseng baroh baroh ki la ia peit ia kata ka song bad don ki longkmie kiba la iathuh ba ha katei ka song ki don bun bah ki kot kiba long ha ka dur jong ka lyngkdop, bad ha katei ka kot la thoh ia u nombar 666, bad ki don ruh ki jingthoh kiba la thoh ha ka ktien phareng kiba la batai shaphang u Adhar nombar. Katei ka jingjia ka la pynkyndit ia baroh, ha ka ing mane jong ka balang Presbyterian Baniun.
La iathuh ruh ba tang mar iawai jingiaseng don ki khynnah kiba la ia law ia ka song bad shim ia katei ka kot, katba don kiwei pat ki ba dang buh bha haduh mynta, la ong ba kiba bun na kitei ki kot lyngkdop ki briew kiba la shim ki la thanglut katba ioh, hynrei ki dang don pa kiba dang buh bha. Shuh shuh la ong ba katei ka jingjia kam shym la jia tang ha ka balang Baniun, hynrei ka la jia ruh ha kiwei pat ki jaka kiba marjan bad katei ka shnong kum ha Sadew bad Khad-ar mer-Mylliem.