|
Shillong: U rang ialehkai ka Shillong Lajong u Phrangki Buam u la wan baarhaduh mynta ha ka jingioh ban thep kol ha kane ka lumpung i-league 2018-19.
U Phrangki u bud ia u nongialehkai ka East Bengal u Jobby Justin uba thep 7 kol katba u Phrangki bad u Laldanmawia Ralte ka East Bengal ki thep mar 4 kol. U Phrangki uba dei na Jaintia Hills u dei uba dang ha ka rta khynnah samla lud ban kynjoh 18 snem ban ioh thep ia kine ki saw kol ha kane ka lumpung I-League 2018/19. Haba kren halor kane, u Phrangki u la ong ba shwa ba kan sdang ka I-League u la buh ia ka thong ban thep kol bun katba lah bad u sngew tynnad ba u la ioh ban thep haduh saw tylli ki kol haduh kine ki sngi. U la ong ba wat la ka Lajong kam lah ban ioh ia ka jingkwah ne ban jop kumba ka dei hynrei ka la ai mynsiem shibun ia u. “Mynta ngi dang pynkhreh ia ka jingialehkai kaban long ha ka sngi Saitjain pyrshah ia ka Real Kashmir bad ngi tip ba ka dei ka jingialehkai kaba donkam bha bad ngi donkam ban khur ia ka 3 point “, u la ong. Ka Shillong Lajong kan iakhun ia ka Real Kashmir FC ha ka 19 tarik ha JN Stadium Shillong por 5 PM. Ia ki tiket lah ban ioh na SSA Counter ha Polo naduh ka 10 AM ha katei ka sngi. |
