Wan ai jinghikai, ki nong Ireland ia ki nonghikai KJDSTA

Shillong, 19 Naitung:
Shi kynhun ki nong-Ireland hapoh ka seng ka Global School Room (GSR) ki la wan sha ka jylla Meghalaya ban ai jinghikai ban pyntbit shuh shuh ia ki  nonghikai kiba don ha ka shatri ka KJDSTA.
Kine ki nongri sep ngi ki la wan poi ha kine ki sngi ba la dep ha kaba kin ai ia ka jinghikai pyntbit ne training kaba shi bnai ia ki nonghikai KJDSTA ha kylleng ki jaka.
U President ka KJD STA u Bah ED Nong siang haba iathuh ia kane hynnin ka sngi ha jing ialang ba pynlong iakop iatyrko ha Shillong, u la iathuh ba kine ki nong-Ireland ki la wan sha kane ka jylla ban ai jingpyntbit ia ki nonghikai kane ka jylla hadien ba la pynbeit bad ka KJDSTA khnang ban pynbha ban kyntiew ia ka pule puthi, kaba long ka jingmyntoi pat ia ki khynnah skul.
“Ki la wan shane da ka mon sngewbha khlem kano kano ka jingsiew ban ai jinghikai pyntbit ia ki nonghikai jong ngi”, la ong u Bah Nongsiang.
Katkum ka jingong u Bah Nongsiang hadien ba la dep kane ka kynhun jongki, kan sa wan sa kawei pat ha kaba kin ai ruh ia ka syrnod sha kito ki nonghikai ka KJDSTA kiba la wan ban shah hikai ynda la dep ka jingai jinghikai jongki.
Ki la ai jinghikai ha ki jaka bapher bapher kum sha Jongksha, Bhoi, sha Nongrah bad sha kiwei ki jaka, la ong u Bah Nongsiang.
U President ka KJDSTA u la ong ba kane ka kam ka dei kaba donkam palat ha kaba ka seng ka ju sngew khia. U la ong ba ki nonghikai ha jaka sor, ki kham biang hynrei sha jaka nongkyndong ka don ka jingiapher bah bad kane ka pyndkoh ia ka pule puthi.
“Ka sorkar ka dei ban sngewthuh ban tip ia kane namar ba kaba donkam ka long ba ki nonghikai ki dei ban ioh ia ka jinghikai kaba biang ban ai pat sha ki khynnah”, u la ong.
Ban pynbha ia ka rukom jinghikai, ka KJDSTA ka la ju pynlong ruh ia ka workshop ia ka sobjek Saian, Jingkhein,bad Social Science nalor kiwei pat ki prokram, la ong u Bah Nongsiang.
Ka Marian bad u Jerry kiba na Ireland haba ai jingkren lyngkot ha kane ka jingialang ki pynpaw ba ki nonghikai ki don beit ka jingeh wat ha ka ri jongki ruh. Hynrei haba ianujor bad ki jingeh jong ki nonghikai ha kane ka jylla Meghalaya ka la long kaba eh palat. Ki nonghikai ha kane ka jylla ki don shibun bah ki jingeh bad kaba donkam ka long ba ki dei ban don ka jingiatylli ban pynkhlain ia ka rukom treikam jongki, la ong kine ki nong-Ireland.