Shillong, 13 Jylliew:
U general secretary ka AICC ba peit ia ka Meghalaya u Mukul Wasnik u um kyntait ia ka khubor ba ka party ka leit ne em ban tyrwa tiket ia u Bah RG Lyngdoh ban iakhun ia ka MP elekshon jong ka Lok Sabha ha 2014 na ka party Congress.
U bah Robert u dei MLA barim ka Congress uba la shah beh seng halor ka jingshlur jongu ban iakren pyrshah ia ki nongialam ka AICC. Hynrei mynta ka Congress ka la sngew donkam biang ia u bad ka la pyrshang ban khroh biang ia u sha sem jongka.
“Kane kam dei ka rynsan ban iaken ia u kyrtong ka party” la ong u Wasnik haba iakren bad ki nongthoh khubor hadien ba la wai ka jingia lang jong ka MPCC Executive Committee hynne ka sngi Palei ha Shillong.
U general secretary ka AICC ba peit ia ka Meghalaya u la kyntait ruh ban ong ei ei la ka party kan shaniah ne em ha u MP ba mynta jong ka Shillong constituency u Bah Vincent H Pala.
Katkum ka jingong u Wasnik, ki la iakren ia ishu ban pynkhreh ia ka elekshon Lok Sabha ban wan shen.
“Ngi khmih lynti ba ka jingpynrung dkhot sha ka party kan nang jur ha kane ka jylla” la ong u Wasnik bad bynrap ba kin sa jop beit ha kane ka elekshon Lok Sabha ban wan ruh na kane ka jylla khlem don jingeh baroh na Shilling bad na Tura.
Ha kajuh ka por, u la ong ba ki la iakren ba ka jingialang jong ka Meghalaya Pradesh Congress Committee (MPCC), District Congress Committee (DCC) bad ki Block Congress Committee (BCC) dei ban long man ka por.
Phi don ban ong eiei?