Wad jingtip paidbah na DIPR, ioh da ka jubab jah ki file & pluh iing

Shillong, 23 Iaiong:
Ka ophis jong ka tnat Information & Public Relations, Shillong, ka la ai daw, ba kam don shuh ki kot ki sla, namar ba katei ka ophis, ka la pluh, ha ka 15tarik Nohprah 2014.
Une u nongthoh, ula wad jingtip, halor ka rukom sam jingpynbna, kaba wan lyngba katei ka tnat sorkar, kaba dei ha ki snem 1999 haduh u snem 2001, hynrei, hadien shibnai, la ioh pynban, da katei ka jubab, kaba iathuh khana shaphang katei ka jingpluh iing bad nangta la iathuh khana ruh, ba ka dei pat ka jingkem ding, kaba malu mala.
Hadien kata, la iathuh shuh, ba hadien, ba la kynriah sha ka ophis, kaba thymmai, la lap, ba ka register, kaba sam ia ki jingpynbna, naduh ka 1tarik Iaiong 1998, haduh ka 31tarik Lber 2005, kaba long hynniew snem kynthih, ka la shu jah rngai noh. Halor katei ka jingjah jong kitei ki kot ba donkam jong ka sorkar, la shu ai daw, ba la buh bakla bad ba ym lap shuh haduh ha kine ki sngi bad ym shym la batai satia, ba ka jingjah, ka dei na ka jingpluh jong katei ka ophis.