“WAD IA U BLEI”

Dr. B.R. Marpna

Kane ka dei ka bynta, kaei kaba U Blei U kwah ia ngi ban wad ia U katba ka por ka dang don ia ngi ban phai sha U Blei. Ka dang don ka lynti jingkyrmen ia kiba la duh jingkyrmen wat lada ngi sngew ba ngi la duh jingkyrmen ha ka jingim jong ngi. Haba ngi iakren ia kane ka bynta, ka long ka jingkhot ka jong U Blei ia ngi ban wad, ban wan hajan jong U. “Wad phi ia U Trai katba dang lah ban shem ia U, to kyrpad ia U katba u dang hajan” (Isaiah 55:6). “Naba kumne u ong U Trai ha ka iing Israel, To wad ia nga, te phin im. To wad ia U Trai, te phin im: ioh ba un mih noh kum ka ding ha ka iing U Joseph, bad ba kan bam duh noh bad ba yn ym don ban pynlip ia ka, ha Bethel (Amos 5:4,6). Kine ki artylli ki dei ki jingkren jong kine ki Nongiathuhlypa jong U Blei ha kito ki por bad ki dang iaikren ia ngi haduh kine ki sngi kiba mynta.

U Jisu Khrist ruh u kren ba lada ngi wad, ngin shem. Haba ngi wad, ka long kumba ngi tied ia ka jingkhang khnang ban ioh ban plie bad shem ia kaei ka jingdonkam jong ngi. Haba ngi wad, ka long ruh ba ngi wan hajan jong U bad ka pynlong ia ngi ba ngin pynkhuid bha ialade da ki dohnud kiba khuid bad khlem arsap hakhmat jong U Blei “To pan, te yn sa ai ha phi: to wad, te phin sa shem: to tied, te yn sa plie ia phi” (Mathaios 7:7). “Nga ruh nga ong ha phi. To pan, te yn sa ai ha phi: to wad, phin sa shem ruh: to tied, te yn sa plie ia phi” (Loukas 11:9). “To wan hajan ia U Blei, te Un wan hajan ia phi, To thet noh ia la ki kti, ko phi kiha pop, bad to pynkhuid noh ia la ki dohnud, ko phi kiba synrop mynsiem” (Jakob 4:8)

Lok baieid ha U Trai Jisu, to ngin nym ialehkai ia la ka jong ka jingim. Ngi im tang shisien ha kane ka pyrthei bad to ngin ialeh tyngeh ban jan sha U Blei ha ki por kiba eh ne kiba suk, ki por kiba shitom ne jynjar, ki por kiba sngewsih ne kmen, ki por kiba khuslai ne kut lad kiba ngi iakynduh ha ka jingim jong ngi kum ki briew khnang ba ngin ioh ia ka jingim bymjukut kaba dang tyrwa lyngba U Jisu Khrist haduh mynta mynne. Ka por jong ka jingaiei ka dang iai khot ia ngi ban wan hajan jong U lyngba ka jingkren bad ka jingpynkynduh U Mynsiem Bakhuid.

U Blei Un Kyrkhu ia ngi lang baroh bad na ka bynta ka burom jong U, Amen.